Вилоят марказида Х. А. Яссавий номидаги халқаро қозоқ-турк университетининг маданият марказида “Балуан Шўлақ” фильми намойиш этилди. Фильмни ҚР Маданият ва спорт вазирлигининг буюртмасига кўра Ш. Айманов номидаги “Қазақфильм” киностудияси тасвирга олган. Фильм режиссёри – Нургелди Садиғулов. Тарихий кинотасма полвон, қўшиқчи ҳамда бастакор Балуан Шўлаққа бағишланган.

Атоқли полвоннинг ролини Еркебулан Дайиров ижро этган. Шу билан бирга Альбина Шардарова, Медғат Ўмиралиев, Александр Багрянцев сингари артистлар қатнашган.

Фильм ғоясининг муаллифи, сценарийсини ёзган ҳамюртимиз, давлат мукофоти соҳиби, ёзувчи, драматург Дулат Исабековдир.

Фильм намойиши олдидан ижодий гуруҳ туркистонлик томошабинлар билан учрашди. Д. Исабеков мазкур фильмни ўзининг кино соҳасидаги энг муваффақиятли лойиҳаларидан бири эканлигини таъкидлади. Режиссёр Н. Садиғулов эса фильм ёшларда ватанпарварлик туйғусини уйғотишига ишонч билдирди. Туркистон вилояти ҳокимининг ўринбосари М. Ўтарбаев ижодкорларга миннатдорчилик изҳор этиб, вилоят ҳокимининг совғаларини топширди.