Қозоғистон Президенти Қасим-Жўмарт Тўқаев Германия Федерал Президенти Франк-Вальтер Штайнмайернинг таклифига биноан расмий ташриф билан ушбу мамлакатга борди.

Ташриф доирасида Берлинда Германия Президенти Франк-Вальтер Штайнмайер ва Федерал канцлер Фридрих Мерц билан музокаралар ўтказилди. Учрашувларда икки мамлакат ўртасидаги стратегик ҳамкорликни мустаҳкамлаш, сармоявий ва технологик ҳамкорликни кенгайтириш, транспорт-логистика алоқаларини ривожлантириш ҳамда энергетика соҳасидаги масалалар муҳокама қилинди.

Давлат раҳбари, шунингдек, Мюнхен шаҳрига ташриф буюриб, Германиянинг етакчи компаниялари, молия ва илмий муассасалари раҳбарлари, университетлар ректорлари билан учрашди. Президент Берлиндаги ҳамда Мюнхендаги технологиялар соҳасига бағишланган бизнес-анжуманларда ҳам иштирок этди.

Германия Қозоғистоннинг Европа Иттифоқидаги етакчи иқтисодий ҳамкорларидан бири ҳисобланади.

Сўнгги йилларда мамлакатларимиз ўртасидаги ҳамкорлик изчил ривожланиб, товар айирбошлаш ҳажми сезиларли даражада ошди. Қозоғистон Германияга тўқимачилик, озиқ-овқат ва бошқа маҳсулотларни экспорт қилмоқда. Ўз навбатида, Германиядан механик ускуналар, транспорт воситалари ва уларнинг эҳтиёт қисмлари, фармацевтика ҳамда кимё маҳсулотлари ва хизматлар импорт қилинмоқда. Соғликни сақлаш соҳасидаги ҳамкорлик ҳам кенгайиб бормоқда.

Қозоғистон Республикаси Президенти Қасим-Жўмарт Тўқаев  ва Германия Президенти Франк-Вальтер Штайнмайернинг тор доирада ҳамда делегациялар иштирокидаги учрашувлари  ўтди.

Музокараларда Қозоғистон – Германия муносабатларини янада ривожлантириш масалалари кўриб чиқилди. Томонлар парламентлар, ҳукуматлар ва ташқи ишлар вазирликлари ўртасидаги фаол алоқаларни давом эттиришга тайёр эканликларини таъкидладилар.

Шунингдек, транспорт ва логистика соҳасидаги ҳамкорлик, қуруқлик ва ҳаво йўлакларини ривожлантириш, транспорт харажатларини камайтириш масалаларига алоҳида эътибор қаратилди.

Учрашувда имзоланган битимларни амалга ошириш юзасидан  қўшма «Йўл харитаси»ни тайёрлаш ва қабул қилишга келишиб олинди.