Илму фани тараққий топган давлатнинг, юртнинг дунё харитасида ўз ўрнига эга бўлиши муқаррар.

Шимкентлик таниқли олим, онколог шифокор, Онкология марказининг кимё билан даволаш ва эндоваскуляр онкология бўлими мудири, PhD докторанти, соғликни сақлаш соҳасини ташкил этиш бўйича магистр, «Илмий истиқбол» халқаро илмий журнали таҳрир ҳайъати аъзоси, Лондонда ўтган «Prezentis” 3-Халқаро онкология анжумани ташкилий қўмитаси аъзоси Даврон Исаматов 5-6 октябрь кунлари Япониянинг Токио шаҳрида Онкология соҳасида даволашнинг янги технологияларини жорий этишга бағишланган 3-Халқаро Конгрессда иштирок этиб, маъруза қилди, ўз билими ва тажрибалари билан ўртоқлашди. 

Ушбу йирик ва нуфузли анжуманда АҚШ, Япония, Жанубий Корея, Туркия, Ироқ, Қатар, Филиппин, Буюк Британия, Хитой, Ҳиндистон, Покистон, Эфиопия, Замбия ва яна қатор давлатларнинг етакчи мутахассислари, таниқли шифокор-олимлари иштирок этиб, онкология соҳасидаги бой илмий тажриба ва тиббий-клиник амалиётлар борасида ўзаро ўртоқлашдилар. Юртимизнинг ягона вакили сифатида иккита илмий маърузаси билан иштирок этган Даврон Рашид ўғлининг чиқиши илмий доира вакиллари томонидан юксак баҳоланиб, эътирофга сазовор бўлди. Бу эса юртимизда тиббиётнинг, айниқса, онкология соҳасининг тобора ривожланиб бораётганидан далолатдир. 

 Эл-юрт фахри, саломатлик посбони – онколог олим Даврон Исаматов ҳали узоқ йиллар соғликни сақлаш соҳасидаги муваффақиятли фаолияти билан хастадиллар дардини аритаверишига, илм-фан соҳасида янада янги ва юксак чўққиларни забт этаверишига ишонамиз.

Етук олиму фузалоларимиз сафи кенгайгани туфайли халқимиз бахтли-саодатли ҳаёт кечираверади.