20 апрелдан бошлаб, аҳолидан ноқонуний равишда сақланаётган қурол-яроғ, ўқ-дори ва портловчи моддаларни харид қилиш юзасидан анъанавий акция бошланди. Бу ҳақда Туркистон вилоят Полиция департаменти Маъмурий полиция бошқармаси раҳбари, полиция полковниги Алмас Тастанбеков маълум қилди.
– Йил бошидан буён 3 марта “Қурол” жадал-профилактик тадбири ўтказилди. 5 апрелда бошланган тадбирда 4 кеча-кундуз давомида 18та ов милтиғи рўйхатга олинди. Шунингдек, 3200дан зиёд қурол эгалари текширилиб, 160та маъмурий ҳуқуқбузарлик аниқланди ва уларга баённомалар тўлдирилди. 20 апрелдан бошлаб вилоятимизда аҳолидан ноқонуний равишда сақланаётган қурол-яроғ, ўқ-дори ва портлатувчи моддаларни сотиб олиш учун махсус акция ўтказилмоқда. Бунинг учун вилоятимизга давлатдан махсус маблағ ажратилди. Шу боис маҳаллий фуқаролар ҳеч қаерда рўйхатга олинмаган қуролга эга бўлса, уни бизга ўтказиб, мукофотга эга бўлишлари мумкин, – деди полиция полковниги.
Кимда ким ўз ихтиёрига кўра уйидаги қуролини ўтказса, унинг техник аҳволи инобатга олиниб, комиссия қарорига кўра 10дан 100гача ойлик ҳисоб кўрсаткичи миқдорида мукофот пули тўланади. Бу маблағ қурол ўтказган шахснинг ҳисоб рақамига тушади.
Ўз ихтиёри бўйича ноқонуний сақланаётган қуролни ўтказган шахс жиноий, маъмурий жавобгарликдан озод этилади.