Ўзбекистон пойтахтида қозоқ ёзувчиси ва мутафаккири ҳаёти ва ижодига бағишланган «Абай. Қардош халқлар мероси»  кўргазмаси  очилди.

Кўргазмада қозоқ халқининг анъанавий ҳаёти, санъати ва ҳунармандчилиги, рангтасвир, графика, Абай ҳақидаги нашрлар, унинг асарлари намойиш этилмоқда. Шунингдек, Абай ҳаёти ва ижодига бағишланган видеолавҳалар ҳам тақдим этилган. Кўргазма 30 декабргача давом этади.  

Тадбирнинг очилиш маросимида Ўзбекистон Бош вазири ўринбосари, Туризм ва маданий мерос вазири Азиз Абдуҳакимов, Қозоғистон Маданият ва спорт вазири Даурен Абаев, Қозоғистоннинг Ўзбекистондаги элчиси Бейбит Атамқулов, шунингдек, оммавий ахборот воситалари ва жамоатчилик вакиллари иштирок этди.

Азиз Абдуҳакимов ўзининг қутлов нутқида бугунги кунда Ўзбекистонда давлат раҳбари раҳнамолигида барча туркий халқларнинг маданий меросини асраб-авайлаш ва тиклаш борасида кенг кўламли ишлар амалга оширилаётганини таъкидлади.

– Бугун очилган  кўргазма буюк мутафаккир Алишер Навоийнинг инсонпарварлик анъаналарини асраб-авайлаган Абай ижодини янада чуқурроқ англаш имконини беришига ишончимиз комил. Унинг халқлар тинч-тотув яшаши, Шарқ ва Ғарб бирлиги, жаҳон меросини ўзлаштириш зарурлиги, инсон табиатини такомиллаштириш ҳақидаги ғоялари ҳозирги босқичда ҳам ўзининг кескинлигини йўқотгани йўқ, – деди Азиз Абдуҳакимов.

Кўргазманинг очилиш маросимидан сўнг тадбир меҳмонлари қозоқ халқининг атоқли фарзанди, шоир, мутафаккир Абай Қунанбаев ҳайкали пойига гуллар қўйдилар.