Шу кунларда минтақамизга қўшни Ўзбекистондан халқаро этнофольклор экспедицияси ташриф буюрди. Ўзбекистон Маданият вазирлиги ҳузуридаги Маданиятшунослик ва номоддий маданий мерос илмий-тадқиқот институти ходимлари томонидан ташкил этилган ушбу гуруҳ таркибида олимлар, тарихчилар ва маданият ходимлари мавжуд. Айни дамда Сайрам тумани, Шимкент ва Туркистон шаҳарлари бўйича экспедиция ўз фаолиятини давом эттирмоқда.

Бу ҳақда 4-сонли Сайрам мусиқа мактаби директори Шокир Умаров билан суҳбатлашдик.

– Ўзбекистонлик делегацияни кутиб олиш, вилоятимиз бўйлаб сафарини ташкиллаштириш масалаларида ҳар доимгидек ҚР “Дўстлик” ҳамжамияти (И. Ҳошимжонов) ва унинг жойлардаги тузилмалари масъул, айтиш жоизки, ишимизни меҳмонларни ўзимиз фаолият юритаётган даргоҳларимизга олиб боришдан бошладик. Бугунги кунда Сайрам даҳасидаги 4-сонли Мусиқа мактаби республикада ягона ўзбек халқи санъатини ўргатадиган муассаса ҳисобланади. Меҳмонлар маҳаллий ўзбекларнинг яшаш тарзи, фольклори, урф-одатлари, анъаналарини ўрганиш мақсадида келгани сабабли, мактабимиз билан танишиш улар учун мароқли бўлди. 125 нафар ўқувчи таҳсил олаётган даргоҳда анъанавийлардан ташқари, ўзбек миллий мусиқа чолғу асбобларидан фойдаланиш сирлари ҳам ўргатилади. Қолаверса, вакиллар келган пайтда ўқувчиларимиз имтиҳон топшираётган эдилар, бу жараён ҳам меҳмонларга қизиқарли бўлди. Анча таассуротлар олишди. 

– Меҳмонлар яна қайси ташкилотларга боришди?

– Делегация маданият йўналиши бўйича ташриф буюргани сабабли биз ҳам халқ ижодиёти, анъаналар ва санъат борасидаги кўп йиллик тажрибаларимизни намойиш этмоқдамиз. Масалан, Сайрам даҳасидаги энг кўп ўқувчига ҳамда энг кўп давлат грантига эга илм маскани – 107-сонли умумтаълим мактабидаги музейга олиб бордик. Музейдаги экспонатлар – Сайрам заминининг бой тарихи, улуғ шахслари ҳақидаги материаллар меҳмонларда чуқур таассурот қолдирди. Айниқса, ўзбек фольклорига оид китоблар тақдимоти унутилмас бўлди. Иброҳим ота, Қорасоч она, Балогардон бобо мақбаралари, Сайрам тарихий музейи, Ўзбек драма театри, Мартўбе тепалиги ва маҳаллий уста Азамат Солиев хонадони каби (дўмбира тайёрланади, барча ўзбек миллий чолғу асбоблари ясалади, таъмирланади ва ҳоказо) манзилларда Қозоғистон ўзбекларининг тарихий ва маданий ҳаёти, шеваси ва зиёратгоҳлари, афсона ва ривоятлари, умумий мусиқий қадриятлари ўрганилди. Дарвоқе, театримиздаги учрашув ҳам меҳмонларга манзур бўлди. Янги спектакль премьерасидан парча ижро этилди, томошабинлар ўзларини худди Сурхондарё воҳаларида юргандек ҳис қилишди. Қадимги миллий безакларимиздан фойдаланган ҳолда тайёрланган декорациядан кўнгиллари чоғ бўлди. 

Сайрам даҳасиги “Оқсоқоллар чойхонаси”да аскиябозликда иштирок этиш, тандир усталари хонадонига бориш ҳам дастурдан жой олди.

Нодирхон Имомсидиқов (107-мактаб директори), Миролим Мирхолдоров (тарихчи-гид) меҳмонларга астойдил ҳамроҳлик қилишди. 

Шимкент шаҳрида эса меҳмонлар Бодоморти даҳасидаги ўзбек оиласига ташриф буюриб, яшаш тарзи билан, маҳаллий нуфузга айланган бетакрор сомса тайёрлаш жараёни билан танишишди. Эр-хотин Мирмахсуд ва Сайёра Мирраҳимовлар ёпган сомса мазаси оғизда қолди. Бўзариқ даҳасидаги Фахриддин Тўрешов хонадонида бешикка белаш маросими ҳам яхши ўтди. Гуллола Ёрматова лапар айтиб, меҳмонларни хушнуд этди. 

Гуруҳнинг бир қисми вилоят маркази – Туркистон шаҳрига, қолаверса, унинг атрофидаги Иқон, Қарноқ каби тарихий қишлоқларга бориб, диққатга сазовор жойлари билан танишмоқда.

Делегациянинг хизмат сафари билан яқиндан танишиш истагида бўлганлар ижтимоий тармоқлардаги сайтларимизга киришлари мумкин. 

– Суҳбатингиз учун раҳмат!