Вилоят ҳокими Нуралхан Кўшеров раислигида ўтган вилоят марказининг меъморчилигига оид йиғилишда минтақада қурилиши юритилаётган иншоотларнинг меъморий лойиҳалари муҳокама қилинди. 

Ҳокимга вилоят марказида амалга ошириладиган янги лойиҳалар таништирилди. Минтақа раҳбари лойиҳалар ижроси борасида Туркистон шаҳрининг Бош режаси ва қиёфасига мувофиқ бўлишини қатъий назоратга олишни топширди. Барча лойиҳалар муддатида бажарилиб, фойдаланишга топширилиши керак. Бош лойиҳага шаҳарнинг 2040 йилга қадар тараққиёт истиқболи жорий этилган. Ҳужжатда тарихий масканлар ва ёдгорликларни сақлашга, шаҳар инфратузилмасини янада яхшилаб, сайёҳлик соҳасини ривожлантиришга эътибор қаратилган.

Туркистон шаҳрининг Дизайн кодида меъморчилик ва шаҳарсозликка қўйиладиган асосий талаблар ва қоидалар мужассам. Бош мақсад – шаҳарнинг маданий меросини сақлаб, меъморчилик бобида ягона услубини шакллантириш ва ихчам шаҳар марказини барпо этиш. Меъморий лойиҳалар муҳокама қилинган мажлисда вилоят марказида барпо этиладиган янги кўп қаватли уй-жойлар ва тадбиркорлик иншоотларининг лойиҳалари ҳам таништирилди. Қатор лойиҳалар тасдиқланиб, баъзи лойиҳалар таҳрир қилинди.

Қурилиш билан бирга, кўкаламзорлаштириш, ободонлаштириш ишлари ҳам амалга оширилади. Бу борада вилоят ҳокими соҳага масъул раҳбарларга тегишли топшириқлар берди.