Қозоғистон Республикаси Бош вазири ўринбосари – Савдо ва интеграция вазири Серик Жуманғарин ва Ўзбекистон Республикаси Бош вазири ўринбосари Жамшид Хўжаев Қозоғистон Президентининг декабрь ойида Ўзбекистонга ташрифи чоғида имзоланган сармоявий битимлар ва савдо шартномаларининг бажарилишини муҳокама қилди, дея хабар беради рrimeminister.kz сайти.

Томонлар қатор лойиҳалар амалга оширилаётганидан мамнун эканликларини қайд этдилар. Чунончи, Тошкент вилоятида  логистика марказини барпо этиш бўйича шартнома имзолаш режалаштирилган. Лойиҳа 2026 йилгача амалга оширилиб, биринчи босқичи 70 миллион долларли сармояларни жалб қилишни назарда тутади.

Яна бир истиқболли қўшма лойиҳа Қозоғистон ва Ўзбекистон чегарасида «Марказий Осиё» халқаро саноат кооперацияси марказини ташкил этишдир. Иншоотни «Атамекен» (Қозоғистон) ва «Гулистон» (Ўзбекистон) халқаро назорат-ўтказиш пунктлари ҳудудида қуриш кўзда тутилган. 

Қозоғистон Республикаси Бош вазири ўринбосари ўзбекистонлик ҳамкорларига Қирғизистон билан чегарада шундай савдо-логистика маркази қурилиши ҳақида ахборот берди ва Ўзбекистон сармоядорлари ва ишбилармонларини ушбу лойиҳада иштирок этишга таклиф қилди.

Ўз навбатида, Ўзбекистон Бош вазирининг ўринбосари Жамшид Хўжаев уни ҳамкорликда амалга оширишдан манфаатдорлигини маълум қилди.

Шунингдек, йиғилишда томонлар ўзаро алмаштириладиган маҳсулотларни муттасил етказиб беришни ташкил этиш учун қўшма ташқи савдо компаниясини ташкил этиш концепциясини маъқуллади. Ишчи гуруҳ иштирокчилари энергетика, транспорт, қишлоқ хўжалиги, электротехника саноати ва машинасозлик, инфратузилмалар қурилиши, фармацевтика, кимё каби соҳаларда ҳамкорлик ва сармоявий лойиҳаларини амалга ошириш масалаларини кўриб чиқдилар.

Кооперация лойиҳаларни амалга ошириш ва импорт ўрнини босиш бўйича тизимли ишлар мониторинги бўйича Қозоғистон-Ўзбекистон ишчи гуруҳининг навбатдаги йиғилиши 2023 йил март ойида Шимкент шаҳрида ўтади.