Европанинг Черногория мамлакатидаги Будва шаҳрида жорий йил 22 октябрдан 3 ноябрга қадар боксдан “Жаҳон чемпионати – 2024” ўтди.

Унда Қозоғистон жамоаси 17та совринни қўлга киритди. 25 нафар ёш боксчимиз куч синашган  нуфузли чемпионатда Қозоғистон жамоаси тарихида илк бор умумий ҳисобда биринчи ўринни эгаллади. Ватандошларимиз 6та олтин, 1та кумуш, 10та бронза медалини қўлга киритишди. Бўранбек Бексултан (51 кг), Тўрехан Сабырхан (67 кг),

Ўнер Сейилхан (71кг), Санжар-Али Бегалиев (75 кг), Елянур Турғанова (50 кг), Аружан Зейнўллаева (81 кг) жаҳон чемпионатининг ғолиблари (“олтин”) бўлишди. Турнирнинг дастлабки босқичида Шимкент шаҳри Енбекши тумани, Турдиобод мавзесида туғилиб ўсган Санжар-Али Бегалиев (75 кг) руминиялик Шуч Лайоштини, сўнгра булғор боксчиси Хашем Халилни енгди, кейинги босқичларда эса кубалик Эбдрю Ардилес, польшалик Фабиан Урбански, финалда  ўзбекистонлик рақиби Жаъфар Шаҳбозов (5:0) билан беллашди ва мутлақ ғалабага эришди. Ва шу тариқа  мамлакатимизнинг медаллар шодасини иккинчи олтин медаль билан бойитди. Биринчи олтин медаль Тўрехан Сабирханга насиб этди.

Миллатдошимиз Санжар-Али Бегалиевнинг ёрқин ғалабаларидан бири озарбайжонлик машҳур спортчи Аббас Агаларов хотирасига бағишлаб ўтказилган ёшлар ўртасидаги халқаро мусобақада (декабрь, 2023 йил) ҳам намоён бўлган эди. У халқаро мусобақа финалида 75 кило вазн тоифасида озарбайжонлик Миржалал Мирағаевни биринчи раундда нокаутга жўнатиб, олтин медаль соҳибига айланди. Ушбу турнирда Озарбайжон, Қозоғистон, Россия, Тожикистон, Саудия Арабистонидан жамоалар ва Литванинг “Рояль” бокс клуби иштирок этган эди. 

Қозоғистон делегацияси мукофот тўла медаллар шодаси, жаҳон чемпиони деган нуфузли ном билан  ватанига қайтиб келди. Қувонарлиси, бу жаҳон чемпионатида қозоғистонликлар натижасини ҳеч ким такрорлай олмади ва ҳамюртларимиз жамоавий дастурда биринчи бўлишди! Ғалаба муборак!

Жаҳон рингларида, финал ўйинларида ғалаба қозонишга муваффақ бўлиб келаётган Санжар-Али Бегалиевни алоҳида муборакбод этамиз. Ота-онаси ва мураббийларига  раҳмат! 

Ғолиб спортчини Шимкент шаҳрида кенг жамоатчилик ва мухлислари қизғин кутиб олишди. Муҳим ғалабани қўлга киритган С. Бегалиев учун бу ғалабалар ҳали бошланиши, уни бундан ҳам катта ютуқлар кутмоқда. Унга доим ўз камарини муносиб ҳимоя қилиш ва муддатидан олдин ғалаба қозониш насиб этаверсин.