Туркистон шаҳрида Қозоғистон Республикаси VI ёшлар спорт ўйинларининг расмий очилиш маросими ўтди. Бу йил ўйинлар Ғалабанинг 80 йиллиги арафасида ўтмоқда. Мажмуавий беллашувлар 24 февралдан 1 октябрга қадар спортнинг 34 тури бўйича ўтказилади. Мусобақада 2000 дан зиёд спортчи иштирок этади.

Туркистон шаҳридаги “Turkestan-Arena” ўйингоҳининг очилиш маросимида Қозоғистон Республикаси Туризм ва спорт вазири Ербўл Мирзабўсинов, вилоят ҳокими Нуралхан Кўшеров, Астана, Алмати, Шимкент шаҳарлари жисмоний тарбия ва спорт бошқармалари раҳбарлари ҳамда вилоятлардаги фахрий спортчилар иштирок этди.

Тадбирнинг очилиш маросимида сўзга чиққан Е. Мирзабўсинов бундай мусобақалар ёш спортчилар учун алоҳида аҳамият касб этишини таъкидлади.

– Туркистон заминида ўтаётган Қозоғистон Республикасининг VI ўсмирлар спорт ўйинларига хуш келибсиз! Бу йил ўйинлар Ғалабанинг 80 йиллиги арафасида ўтмоқда. Аждодларимиз қонли жанггоҳларда мислсиз жасорат кўрсатиб, бизга осуда осмонни ато этди. Қаҳрамонларнинг жасорати ва матонатини унутмаслигимиз керак. Маълумки, Давлат раҳбари спорт соҳасини ривожлантиришга алоҳида эътибор қаратмоқда. Бунинг самарасида мамлакатимиз спорти савияси йилдан-йилга ошиб бормоқда. Спортчиларимиз халқаро мусобақаларда юксак муваффақиятларга эришиб, юртимиз байроғини сарбаланд этмоқда. Ёшлар ўртасидаги спорт ўйинлари каби мажмуавий тадбирлар эса мамлакатимиз спортини янги босқичга кўтаришга туртки бўлади. Шунингдек, улар ёш авлодни соғлом турмуш тарзига ўргатади. Ишончим комилки, бу йил энг яхши спортчилар шоҳсупага кўтарилади, – деди Туризм ва спорт вазири.

Вилоят ҳокими Нуралхан Кўшеров минтақада спорт соҳаси жадал ривожланаётганини таъкидлади.

– Тарихий шаҳарга хуш келибсиз! Давлатимиз раҳбари спортни ҳар томонлама ривожлантириш юзасидан кўрсатмалар берди. Бугун Туркистонда ёшларнинг VI спорт ўйинлари бошланди. Бу юрт келажаги бўлган ёшларимизнинг маҳоратини оширувчи, янги чемпионларни кашф этувчи муҳим мусобақадир. Бу йилги мусобақада мамлакатимизнинг барча ҳудудларидан 2 минг нафардан зиёд ёш спортчилар иштирок этмоқда. Туркистон вилоятида спортнинг 34 тури бўйича 300дан зиёд спортчи иштирок этади. Бундай йирик тадбирнинг Туркистонда ўтказилиши табиийдир. Чунки вилоятда спорт инфратузилмаси яхши ривожланган. Оммавий спортни ривожлантириш мақсадида 2024 йилда 73та замонавий спорт иншооти фойдаланишга топширилди, 2025 йилда яна 51таси эшикларини очади. Улар орасида эшкак эшиш канали ва отчопар ҳам бор. Спорт мусобақаларида нафақат вилоят, балки бутун мамлакатимиз шарафини муносиб ҳимоя қилмоқдасиз. Ушбу беллашув орқали сиз юксак марралар сари қадам ташлайсиз. Жаҳон чемпиони, Олимпия чемпиони бўлинг! Барчангизга ҳалол рақобат, муваффақият ва ёрқин ғалабалар тилайман! – деди Н. Кўшеров.

Ёшларнинг VI спорт ўйинлари мамлакатимизнинг барча ҳудудларида ўтади. Туркистонда баскетбол, байдарка ва каноэда эшкак эшиш бўйича ҳам мусобақалар ташкил этилади.

Таъкидлаш жоизки, Қозоғистон Республикасининг VI ўсмирлар спорт ўйинлари жорий йилда Қозоғистон Республикасида 2023-2029 йилларда жисмоний тарбия ва спортни ривожлантириш концепсиясини амалга ошириш, миллий терма жамоани шакллантириш ва халқаро мусобақаларга, жумладан, жорий йилда Баҳрайнда ўтадиган ёзги ўсмирлар Осиё ўйинларига тайёргарлик доирасида ўтказилмоқда.