"Жанубий Қозоғистон"

Эл севган матбуотим, «Жанубий Қозоғистон»,

Йиллар тарихида сен ошиб ўтдинг минг довон,

Миллатим ойдин йўли, сенда эрур мужассам,

Халқ сўзидан сўзладинг, сенга ҳамроҳ, ҳур замон. 

Меҳнат қилдинг туну кун, ҳақиқатчун тикиб жон,

Илму фан,  маърифатда , саҳифалар бир жаҳон,

Мовий ранг байроғимни, танитиб сен дунёга,

Бугун ўзинг танилдинг «Жанубий Қозоғистон».

Буюк Қозоқ элимга матбуот ўзбекзабон,

Уфқларинг кенг, теран, ақл-заковат посбон,

Бош муҳаррир Алишер, Мир Алишер авлоди,

Ортаверсин ададинг, халқинг серқирра боғбон.

Ҳурматинг бўлди хирмон, адолатпарвар сарбон,

Она тилимда эркин сўзлайсан сен равон,

Илмингдан эл баҳраманд, Мир Алишерга монанд,

Ўзинг бетакрор эҳсон, «Жанубий Қозоғистон».

Йиғлатур

Эй, фалак, жон керакму, ол, золим хунхорим йиғлатур, 

Етмаса жон жаҳоним ол, бўйнимда дорим йиғлатур.

Ул чархи олам кўрмаган, кимса бир ҳолим сўрмаган,

Мен маҳзуни ғарибингман, нағмаи торим йиғлатур.

Мажнундай умргузарон, Саҳрои-Кабир кезибон,

Лайлига озор берибон, аҳли гуфторим йиғлатур 

Ишқимни тутиб мен пинҳон, сиру асрорим кўп ниҳон, 

Парвона кўнглимда армон, чорасиз корин йиғлатур. 

Фироқингда танда оташ, минг дардга  гирифтор бу бош, 

Қалбим мулки бўлди бардош, номуси орим йиғлатур.

Ўртаб хонумонум магар дилда ёдгорим ситамгар,

Ошно ғанимлар кулса гар, дўсти ахборим  йиғлатур.

Ким юзим  кўрса заъфарон, хастадил дастингдан хазон 

Садоқатда Ҳуринг ҳамон такрор ағёрим йиғлатур