Қатор давлат мукофотлари совриндори, Қозоғистон Ёзувчилар уюшмаси бошқаруви аъзоси, адабий танқидчи, филология фанлари доктори, профессор Қулбек Ергўбек билан мулоқотимиз унинг ижодхонасида кечди. Суҳбат мавзуи – Қозоғистонда Ўзбекистон йили ва адабиётга алоқадор масалалар. 

– Ҳурматли Қулбек оға! Сизни жамоатчилик таниқли ёзувчи ҳамда Қозоғистон ва Ўзбекистон адабиётлари ўртасидаги мустаҳкам кўприк, шу қадрли неъматни улуғлаб ўтган Миртемир Турсунов, Одил Ёқубов, Носир Фозилов, Мирпўлат Мирзо каби машҳур шоир – адиблар ижодини ўрганиш, тарғиб қилиш ишига муносиб ҳисса қўшаётган филолог олим сифатида ҳурмат қилишади. 

Яқинда Туркистонда ўтган Ўзбекистон Ёзувчилар уюшмаси делегацияси иштирокидаги улкан анжуманда сиз ажойиб маъруза қилиб “Адабиётлар дўстлиги – абадий дўстлик” мавзусини салмоқли илмий-амалий мулоҳазаларингиз билан янада мустаҳкамладингиз. Юқорида номлари зикр этилган ёзувчи-шоирлар Кентов, Туркистон ва Сайрамдан. Миллионлаб мухлисларга эга бўлган, ўз даврида жуда катта маънавий, маърифий, маданий аҳамият касб этган бу инсонларнинг хотирасини абадийлаштириш масаласида мурожаат қиляпман. 

– Тўғри ва ўринли мулоҳаза, таклиф. Қўллайман. Мен ёзувчи ҳамда бу машҳур кишилар билан бевосита мулоқотда бўлган, яхши билган ҳамкасб сифатида Қозоғистон ва Ўзбекистон Ёзувчилар уюшмаларига мактуб жўнатиб, бу савоб ишга ўз ҳиссамни қўшсам, ўзимни бахтиёр деб биламан. 

– Раҳмат, жорий йили сизнинг таваллудингизга 65 йил тўлади. Шу сана, қолаверса, қозоқ-ўзбек адабиётлари ҳамкорлиги доирасида китобхонлар билан учрашув уюштиришни режалаб қўйганмиз. Сизга соғлик, саодат, омад ёр бўлсин!