Саккизинчи чақириқ Туркистон вилоят маслаҳатининг биринчи сессияси ўтди. Сессия ишида вилоят ҳокими Дархан Сатибалди иштирок этди. Йиғилишда вилоят маслаҳати депутатларига депутатлик гувоҳномалари тантанали равишда топширилди.

Сессиянинг  кун тартибидаги биринчи масала бўйича саккизинчи чақириқ Туркистон вилоят   маслаҳати  раиси этиб Нурали Абишев сайланди. Шу билан бирга вилоят маслаҳатининг доимий комиссиялари тузилиб, аъзолари ва раислари сайланди.

Туркистон вилояти ҳокими Дархан Сатибалди  депутатлар зиммасига улкан масъулият юкланишини таъкидлаб, уларни минтақани  ривожлантириш йўлида ҳамжиҳатликда ҳаракат қилишга чақирди.

 Президент Қасим-Жўмарт Тўқаев Қозоғистон халқига Мактубида  адолатли Қозоғистонни яратиш йўлида янги сайлов тизимини таклиф қилди. Бу ташаббус ҳаётга татбиқ этилиб, бир мандатли сайлов округларидан 23 нафар, партия рўйхати бўйича 23 нафар депутат вилоят маслаҳатига сайланди. Янги сайланган депутатлик корпусининг 12 нафари қишлоқ хўжалиги, 11 нафари тадбиркорлик, 8 нафари қурилиш соҳаси, 5 нафари ҳуқуқ-тартибот органлари, 10 нафари таълим ва ижтимоий-сиёсий соҳа вакилларидан иборат.