Туркистон вилоят ҳокими девонининг мажлисида соғликни сақлаш соҳасидаги долзарб масалалар, тез ёрдам хизматининг фаолияти муҳокама қилинди. 

Вилоят ҳокими Дархан Сатибалди соғликни сақлаш соҳасининг моддий-техника базасини мустаҳкамлаш давом эттирилишини айтиб, бошқарма бошлиғи ва бош шифокорларга шу йўналишдаги тадбирларни кучайтиришни топширди.

– Туман ва шаҳарларда бўлганимизда тиббиёт соҳасида муаммолар кўплигига амин бўлдик. Айрим ҳудудларда тиббиёт муассасаларининг ҳолати қониқарсиз. Бундан ташқари, аҳолидан ҳам шикоят ва аризалар келиб тушмоқда. 1414 ягона алоқани қўллаб-қувватлаш маркази орқали 221та шикоят келган. Уларнинг аксарияти – Сариоғоч, Сайрам, Тулкибош ва Жетисай туманларидан. Шунингдек, 109 ягона алоқа маркази орқали тез ёрдам хизматига доир 25та қўнғироқ рўйхатга олинган. Уларнинг аксарияти тез ёрдам машиналарининг кечикишидан шикоят қилган. Муаммоларни бартараф этишга ҳаракат қилиш керак. Шифокорларнинг аҳоли билан мулоқотини яхшилаш, тиббиёт муассасаларини жиҳозлар билан таъминлашни жонлантириш зарур. Биз долзарб масалаларни мунтазам муҳокама қилиб, ёрдам беришга тайёрмиз, – деди Дархан Сатибалди. 

Вилоят соғликни сақлаш бошқармаси раҳбари Асхан Байдуалиевнинг айтишича, минтақадаги 2 миллиондан зиёд аҳолига 216та бригада тез тиббий ёрдам хизматини кўрсатади, бу албатта оз. Вилоят тез тиббий ёрдам станциясининг 6та шаҳар, 17та туман бўлими мавжуд. Бекатларда санитария автомашиналарининг сони 190та.

Йиғилишда эски автомобилларни янгисига алмаштириш, мутахассис, шифокорлар тақчиллигини бартараф этиш, станцияларнинг техник базаларини янгилаш, 103 алоқа хизматини яхшилаш масалалари таҳлил қилиниб, таклифлар айтилди.