Қозоғистон Республикаси Бош вазири Алихан Смаилов ҚР Президенти топшириғига биноан, Иқтисодий ҳамкорлик ташкилотининг 16-саммитида иштирок этиш учун Ўзбекистонга ташриф буюрди.

Тошкентдаги тадбир арафасида Алихан Смаилов мамлакат Президенти Шавкат Мирзиёев билан учрашди.

Бош вазир бугунги кунда икки давлат ўртасидаги муносабатлар ишонч ва ўзаро англашувга асосланган стратегик ҳамкорликнинг ёрқин намунаси эканини таъкидлади.

Алихан Смаилов таъкидлаганидек, олий даражада эришилган барча келишувларнинг ижроси Қозоғистон Республикаси ва Ўзбекистон Республикаси ҳукуматлари назоратида.

Мақсад – икки томонлама ҳамкорлик учун мустаҳкам ва барқарор иқтисодий майдон яратиш.

– Ўзбекистон Қозоғистоннинг энг йирик савдо ҳамкорларидан биридир. Марказий Осиёдаги умумий савдо ҳажмининг қарийб 70 фоизи мамлакатларимиз улушига тўғри келади. Ўтган йил охирида товар айирбошлаш ҳажми 30 фоизга ўсди ва илк бор 5 миллиард долларга етди. Галдаги режа – ўзаро товар айирбошлаш ҳажмини 10 миллиард долларга етказиш, – деди ҚР Бош вазири.

Унинг сўзларига кўра, Қозоғистон Ҳукумати Ўзбекистон билан икки томонлама ҳамкорликнинг барча йўналишларини изчил ривожлантиради.

Ўз навбатида, Шавкат Мирзиёев икки давлат ўртасидаги стратегик келишувлар ҳаётга тизимли равишда татбиқ этилаётганини таъкидлади. Бу савдо, транспорт ва сув хўжалиги соҳасидаги ҳамкорликка ҳам тегишли.

– Менимча, мамлакатларимиз ўртасида ҳал қилинмаган бирорта ҳам муаммо йўқ. Савдо соҳасида Қозоғистон Президенти билан келишилган лойиҳалар янги марраларни забт этишимизга ёрдам беради, – деди Ўзбекистон Президенти.