Вилоят ҳокими Д. Сатибалди Сайрам туманига хизмат сафари давомида Низомобод қишлоғидаги «Ecoinvest S.A» МЧБ иссиқхонасига ташриф буюрди. Лойиҳа қиймати 7,5 миллиард тенге бўлган иссиқхонада йилига 6000 тонна помидор етиштирилади, иккинчи мавсум чоғида эса 12000 тонна маҳсулот териб олинади.

Таъкидлаш жоизки, иссиқхона фаолияти хориж сармояси ҳисобидан йўлга қўйилди. Иккинчи мавсум чоғида 320 киши доимий иш билан таъминланади. Ҳозир 170 одам ишламоқда. 

Вилоят раҳбари қишлоқ хўжалиги ва тадбиркорлик соҳасидаги ишларни, бундай лойиҳаларни янада кўпайтириш юзасидан кўрсатма берди.

Сўнг Оқсувкент қишлоғи марказидаги «Фаол узоқ умр кўриш маркази»нинг тантанали очилиш маросимида иштирок этди. Ушбу марказ пенсия ёшидаги фуқаролар ва ногиронларнинг ҳаёт сифатини яхшилашга хизмат қилади. 

Дархан Сатибалди Манкент қишлоғидаги «Өзге» спорт мажмуаси фаолиятини ҳам кўздан кечирди. Иншоотнинг қиймати 770 млн. тенге. Шунингдек, унга «Оддий нарсалар иқтисодиёти» дастури доирасида давлатдан 170,0 млн. тенге миқдорида ёрдам кўрсатилган. 15 киши доимий иш билан таъминланган.