Вилоятимизда йўл қурилишини сифатсиз юритган компаниялар судга берилиб, қонун доирасида жавобгарликка тортилади. Ушбу соҳага оид масалалар вилоят ҳокимининг девон мажлисида муҳокама қилинди. Минтақа раҳбари Дархан Сатибалди мутасадди бошқарма раҳбари, туман ва шаҳар ҳокимларига йўлсозлик соҳасидаги ишларни сифатли амалга ошириш зарурлигини таъкидлади.

Вилоят йўловчилар транспорти ва автомобиль йўллари бошқармаси раҳбари Қуатжан Жуматаевнинг айтишича, 2023 йилда вилоятимизда 48 млрд. тенгега 676та иншоот, яъни, 1586,4 чақирим йўл таъмирланган. 2024 йилда 747,8 чақирим автомобиль йўллари ва аҳоли манзилларидаги кўчаларни таъмирлаб, янгилаш режаланган. Уларга республика ва вилоят бюджетидан, шунингдек, “Қишлоқ – юрт бешиги” лойиҳаси доирасида маблағ ажратиш давом эттирилади. 2024-2026 йилларда вилоят, туман аҳамиятига молик 2445,6 чақирим йўл ва кўчани таъмирлаш кўзланган. Натижада уларнинг яхши ва қониқарли улуши 95 фоизга етади.

Вилоятимизда йўллар сифатига мунтазам мониторинг юритилмоқда. Тегишли ташкилотлар орқали йўллардан намуналар олиниб, камчиликлар аниқланган. Бошқарма томонидан мутасадди идораларга 170га яқин огоҳлантириш хати йўлланган. 19та иншоот бўйича 24,3 млн. тенге жарима солинган.