Вилоятимизда пахта кластерини ривожлантириш ишлари олиб борилмоқда. Шу мақсадда пахта хомашёсини сотишдан ташқари, унинг толасини чуқур қайта ишлашга устувор аҳамият қаратилмоқда. Туркистон индустриявий минтақасида енгил саноат етакчи тармоққа айланади.

Вилоят раҳбари Дархан Сатибалди Саврон туманидаги “Казтекс” МЧБга қарашли пахтани қайта ишлаш корхонаси фаолияти билан танишди. Мазкур заводни қуриш ва янги технология билан таъминлаш лойиҳаси жорий йилда бошланган. Туркиядан сармоядорлар жалб қилинди.

Лойиҳа қиймати 1500,0 млн. тенге, қуввати йилига 10 минг тонна пахтани қайта ишлашдан иборат. Ишчиларнинг 150 нафари мавсумий, 35 нафари доимий иш билан таъминланган.

– Бугунги кунда қишлоқ хўжалигини жадал ривожлантириш, унинг иқтисодий самарадорлигини ошириш кластер тизими билан боғланмоқда. Бинобарин, қишлоқ хўжалиги, айниқса, пахтачилик тармоғи қанчалик саноатлашса, давлатнинг экспорт салоҳияти шунчалик ортади, халқнинг турмуш фаровонлиги юксалади. Пахта етиштириш ва чуқур қайта ишлаш давлат томонидан қўллаб-қувватланмоқда. Бу борада аниқ қадамлар қўйилмоқда. Пахта кластерини ривожлантириш – муҳим масала. Янги технологиялар жорий этилиши керак. Тадбиркорлик фаолиятини йўлга қўймоқчи бўлган, цех ёки фабрика очмоқчи бўлган фуқаролар қўллаб-қувватланади. Вилоятда етиштирилган пахтани қайта ишлаш, деҳқонлар даромадини оширишимиз керак, – деди Дархан Сатибалди ва мутасаддиларга тегишли кўрсатмалар берди.

– Вилоятимиздаги махсус иқтисодий минтақада пахта кластерини ривожлантириш имкониятлари мавжуд. Минтақавий дастур қабул қилинди ва биз бу борада кенг қамровли ишларни амалга оширамиз. Енгил саноатнинг ривожи кўплаб янги иш ўринлари яратиш имконини беради. Пахта кластерини ривожлантиришга алоҳида устуворлик қаратилади, – деди лойиҳа раҳбари Тўражон Саидов. – Ушбу биродарлик узоқ йиллардан буён пахтачилик билан шуғулланади. Яқинда хориждаги ҳамкорлардан замонавий пахтани қайта ишлаш корхонаси қуриш таклиф қилинди. Туркиядан махсус қурилмалар, пахтани қайта ишлаш дастгоҳлари келтирилди. Буларнинг ўзига хослиги шундаки, улар электр энергиясини тежаб, сифатли пахта толаси ишлаб чиқаради. Зарур дастгоҳлар харид қилинди. Ушбу завод сентябрь ойида ишга туширилиб, деҳқонлардан пахта қабул қилишни бошлайди. 2025-2026 йилларда эса мазкур завод ёнида нефтни қайта ишлаш ва ишлаб чиқариш цехини очиш режалаштирилган.

Республикада пахта толасини чуқур қайта ишлайдиган 2та корхона мавжуд. Шу боис вилоятда етиштирилаётган пахта толасининг атиги 15 фоизи қайта ишланади. Шу билан бирга, пахта кластерини ривожлантириш учун яқин 5 йилда Мақтаарал, Ўрдабоши, Саврон, Чордара, Жетисай туманларида 12та тўқимачилик ва тикувчилик фабрикасини очиш режаланган. Бунинг натижасида пахта толасини чуқур қайта ишлаш ҳажми 17 минг тоннадан 66 минг тоннагача оширилади.