Минтақавий кадрлар захираси рўйхатига кириш имконияти ҳар бир истеъдодли ёш йигит-қизда мавжуд. Мамлакатимизда илк бор ўтаётган танловда иштирок этаётган бошқарув қобилиятига эга иқтидорли ёшларда ҳар қандай лавозимда ишлаш салоҳияти юқори. Вилоятимизда минтақавий захирага саралашнинг якуний босқичи бошланди.

Илк бор ташкил этилган танловга 634 номзод ариза топширган. Вилоят ҳокими Дархан Сатибалди раислигидаги кадр комиссияси олдида дастлабки 50 нафар номзод ўз лойиҳаларини ҳимоя қилди. 30 нафар номзод танлов ғолиби сифатида кадрлар захирасига қабул қилинди. Якуний саралашга келган ҳар бир номзод билан алоҳида суҳбатлашган вилоят ҳокими уларга қимматли маслаҳатларини берди.

Саралашда 35 ёшга тўлмаган, олий маълумотли ва 3 йилдан кам бўлмаган меҳнат тажрибасига эга Қозоғистон Республикаси фуқаролари onir.pkrezerv.gov.kz сайтида ҳужжатларни топшира олади. Март ойидан буён танловга ариза берган фуқаролар саралашнинг уч босқичидан ўтди. Лойиҳанинг қонунларни билиш, шахсий хусусиятлари ва ваколатларини баҳолаш сингари дастлабки босқичларидан муваффақиятли ўтганлар суҳбат босқичида иштирок этмоқда. 

Саралаш минтақадаги 6та соҳавий йўналишдаги кадр тақчиллиги инобатга олинган ҳолда ўтказилди. Номзодлар индустрия, саноат, иқтисодиёт, молия, ижтимоий соҳа, коммунал хўжалик, инфратузилма, агросаноат, ер муносабатлари, рақамлаштириш соҳаларини ривожлантириш йўналишида омадларини синашди.