Туркистон вилояти марказида “Туркистонни яшнатаётганлар” тадбири ўтди ва унда йилнинг энг яхши вакилларига эҳтиром кўрсатилди. Тантанали йиғилишда вилоят ҳокими Дархан Сатибалди ҳалол меҳнати билан қадр топиб, ўз соҳасида муваффақиятларга эришаётган бир гуруҳ фуқароларга мукофотлар топширди.

– Бу йил Туркистон вилояти ташкил топганига 6 йил тўлди. Бу давр вилоятнинг ижтимоий-иқтисодий тараққиётидаги улкан ўзгаришлар билан тарих зарварақларига муҳрланади. Яқинда Давлат раҳбарининг таклифи билан Туркистон шаҳрига алоҳида мақом бериш мақсадида махсус Қонун ишлаб чиқилиб, Парламент уни биринчи ўқишда қабул қилди. Мазкур Қонун тарихий шаҳарнинг тараққиётига янги суръат бағишлайди. Бу ижобий ўзгаришларнинг барчасида сизнинг меҳнатингиз алоҳида аҳамиятга эга. Вилоят тараққиётига қўшган ҳиссангиз учун ташаккур! Бурчини дилдан адо этаётганлар албатта, муваффақиятга эришади. Биз ёшлар ва жамиятимиз онгига меҳнатсеварликни, ватанпарварликни сингдиришимиз керак. Тарихий Туркистонимизни рақобатбардош, фаровон ва обод ҳудудга айлантириб, биргаликда ривожлантирайлик! – деди Дархан Сатибалди.

Йилнинг якуний йиғилишида меҳнати барчага ибрат бўлган бир гуруҳ фуқаролар “Алоҳида хизматлари учун” ва “Меҳнат фахрийси” медаллари билан тақдирланди.

Жорий йилнинг март ойида Туркистон вилоятида “Ибратли қишлоқ” вилоят кўрик-танлови бошланди. Танлов қишлоқларни ободонлаштириш, кўкаламзорлаштириш ва ривожлантиришга қаратилган. Келгуси йилда ғолиб қишлоқларда, бир вақтнинг ўзида биттадан ижтимоий иншоот қурилади.

Тантанали маросимда мазкур қишлоқлар раҳбарлари тақдирланди. 

Шунингдек, 40та турли номинациялар бўйича йил пешқадамлари тақдирланди.

Тадбир сўнггида йиғилганларга вилоят санъат усталари ва эстрада юлдузлари иштирокидаги мусиқий-хореографик дастур тақдим этилди.