Естибаев Асқар Султанули Тулкибош тумани ҳокими этиб тайинланди.

Туркистон вилояти ҳокими Дархан Сатибалди туман фаолларига янги ҳокимни таништирди. Туман маслаҳати депутатлари унинг номзодини қўллаб-қувватлади.

Илгари ушбу лавозимда ишлаб келган Изтилеуов Нуржан Жақсилиқули бошқа ишга ўтганлиги муносабати билан лавозимидан озод этилди.

– Ишончим комилки, янги ҳоким депутатлар билан биргаликда туманнинг ижтимоий-иқтисодий кўрсаткичларини юксалтириш, аҳоли учун қулай шароитлар яратиш, Президентимиз сиёсатини ҳаётга татбиқ этиш учун барча саъй-ҳаракатларини амалга оширади. Асосий мақсад – сармоя жалб этиш, ишлаб чиқариш корхоналарини очиш, аҳоли фаровонлигини ошириш, – деди Дархан Сатибалди.

Асқар Естибаев 1974 йил Тулкибош туманида туғилган. “Ҳуқуқшунос” ва “иқтисодчи” мутахассисликлари бўйича олий маълумотга эга. Меҳнат фаолиятини 1998 йилда Алмати шаҳар Алмали туман судида суд ижрочиси лавозимида бошлаган. 2013–2022-йилларда Шимкент шаҳар ҳокими маслаҳатчиси, 2022 йил октябрдан Туркистон вилояти ҳокими девони раҳбари ўринбосари лавозимида ишлаган.