Минтақалараро ҳамкорликни ривожлантириш доирасида Туркистон вилояти делегацияси, Қозоғистон ишбилармон доиралари вакиллари, шунингдек, Қозоғистоннинг Ўзбекистондаги Фавқулодда ва мухтор элчиси Бейбит Атамқулов Жиззах вилоятига амалий ташриф билан борди.

Делегация таркибига Жетисай ва Мақтаарал туманлари ҳокимлари Серик Мамитов ва Бахит Асанов, Туркистон вилояти тадбиркорлик ва саноат бошқармаси бошлиғи вазифасини бажарувчи Қанат Шўнбасов, туризм ва қишлоқ хўжалиги бошқармалари, “Туркистон” ҲЖ вакиллари ҳамда вилоят тадбиркорлари кирди. 

Яқинда Жиззах вилояти ҳокими этиб тайинланган Улуғбек Мустафоев билан учрашувда трансчегаравий савдо, транзит-транспорт салоҳияти, сайёҳлик соҳасидаги ҳамкорлик масалалари муҳокама қилинди.

Қозоғистон элчиси ҳудудлар салоҳиятини ўрганиш зарурлигини таъкидлади, бу  мамлакатлар ўртасидаги товар айирбошлаш доирасини кенгайтириш ва умумий товар айланмасини ривожлантиришга хизмат қилади. Шунингдек, у ишбилармон доиралар ўртасида бевосита  алоқаларни йўлга қўйиш, қўшма сайёҳлик йўналишларини ишлаб чиқиш ва чегарадош ҳудудлар фуқаролари учун автобус қатновини ташкил этиш муҳимлигини таъкидлади.

Жиззах вилояти ҳокими савдо, туризм (шу жумладан, тиббиёт туризми), таълим ва бошқа истиқболли йўналишларда ҳамкорликдаги саъй-ҳаракатлар муҳимлигини таъкидлаб, ҳудудлар ўртасидаги ҳамкорликни ривожлантиришга кўмаклашишга тайёрлигини маълум қилди.

Учрашув якунлари бўйича Туркистон вилояти туризм бошқармаси ва Жиззах вилояти Зомин курорт мажмуаси дирекцияси ўртасида ҳамкорлик меморандуми имзоланди. Ҳужжат сайёҳлик салоҳиятини ривожлантириш ва вилоятлар ўртасидаги маданий алоқаларни мустаҳкамлашга қаратилган.