Тегишли қарорни Қозоғистон Республикаси Бош вазири Ўлжас Бектенов имзолади.

Машҳур тарихий обида – Хожа Аҳмад Яссавий мақбараси ЮНЕСКОнинг Бутунжаҳон мероси рўйхатига киритилган биринчи Қозоғистон иншооти бўлиб, ўрта аср меъморчилигининг ноёб ёдгорликлари қаторига киради.

Унинг аҳамияти ва тарихий-маданий қадриятини инобатга олган ҳолда, шунингдек, хавфсизлигини таъминлаш мақсадида “Ҳазрат Султон” музей-қўриқхонасини давлат муҳофазасига олинадиган иншоотлар рўйхатига киритиш тўғрисида Ҳукумат қарори қабул қилинди.

Ҳужжатга кўра, иншоот хавфсизлиги ички ишлар органларининг тегишли бўлимлари томонидан таъминланади.

Маълумки, мақбара Туркистон шаҳридаги туркий шоир, сўфийлик тариқати асосчиси Хожа Аҳмад Яссавий дафн этилган жойда барпо этилган.

1385-1405 йилларда мақбара атрофида иншоотлар мажмуаси барпо этилган бўлиб, ҳозирда музей-қўриқхона таркибига масжид, сарой заллари – катта ва кичик оқсарой, кутубхона ва хўжалик мажмуаси – қудуқ, ошхона, ҳужралар ва бошқалар киради.