Республика куни муносабати билан Қ. Жандарбеков номидаги Маданият уйида ўтган тантанали тадбирда Сайрам тумани ҳокими Арман Сабитов йиғилганларни байрам билан табриклади.

– 34 йил аввал, ушбу кун Республикамиз Мустақиллиги декларацияси қабул қилинган эди. Бу мустақиллик сари интилаётган ёш давлатимиз ҳаётидаги улкан воқеа бўлди. Шу боис, ушбу кун халқимиз ҳаётидаги унутилмас саналардан бири ҳисобланади. Эгамен элимизнинг қутлуғ айёми муборак бўлсин! Барчангизга мустаҳкам соғлик, фаровонлик, оилаларингизга улкан бахт тилайман! Юртимиз омон, халқимиз тинч бўлсин! – деди у.

Шундан сўнг туман ҳокими А. Сабитов ва туман маслаҳати раиси Ш. Холмуродов туманнинг иқтисодий-ижтимоий ва маданий-маънавий тараққиётига ҳисса қўшган С. Акромов, Х. Муҳиддинов, А. Мирзалиев, Ў. Букурова, Р. Туребаев, И. Притула, Т. Абдраманов, Д. Алметова, Р. Ерназарова, М. Гусейнов, А. Турсунқулов, Е. Асилбекова, М. Байғараева, Т. Тўлендиев, К. Дуйсебеков, А. Абдраман, Қ. Кенжебаев, С. Кенжебекев, Е. Жайлаубеков, Қ. Қўжамбердиев, Т. Раимбердиев, Ш. Қурбоналиев каби меҳнат фахрийларини “Сайрам туманининг фахрий фуқароси” унвони билан тақдирладилар. Шунингдек, вилоят миқёсида ўтган “Олтин куз – 2024” тадбиридаги фаол иштироки ҳамда қишлоқ хўжалиги соҳасидаги ютуқлари учун Қорабулоқ, Қайнарбулоқ, Қорасув қишлоқлари ҳокимлари К. Абдулаҳадов, Е. Дуйсебаев ва А. Бурбековга туман ҳокимининг ташаккурномалари топширилди.

Театрлаштирилган саҳна кўринишларида тарихнинг олтин зарварақлари намойиш этилди. Ватанпарварлик руҳидаги куй-қўшиқлар иштирокчилар кайфиятини кўтарди.