Вилоят ҳокими Нуралхан Кўшеров раислигида Минтақавий сармоявий штабнинг навбатдаги йиғилиши ўтди. Тадбирда вилоятда амалга оширилаётган сармоявий лойиҳаларининг ижроси ва сармоявий ташаббусларнинг истиқболи муҳокама қилинди. Муаммолар очиқ айтилиб, туман ва шаҳар ҳокимлари, мутасадди идоралар раҳбарлари ва сармоядорларга аниқ топшириқлар берилди.

– Биз сармоядор ва тадбиркорларни қўллаб-қувватлашга доим тайёрмиз. Бироқ, ер олиш ва лойиҳалар ижросини кечиктириш каби камчиликларга йўл қўйилмаслиги керак. Мутасадди бошқармалар, маҳаллий ҳокимликлар сармоядорлар билан яқиндан ҳамкорлик қилиб, лойиҳалар ижросини ўз вақтида таъминлаши керак, – деди Нуралхан Кўшеров.

 Тадбирда сўз олган нотиқлар Сўзоқ туманида учта лойиҳа амалга оширилгач, 1000дан ортиқ иш ўрни яратилишини, Кентов шаҳрида 2026 йилда ишга тушириладиган завод 1500 кишини иш билан таъминлашини таъкидладилар. 

Тулкибош, Қазиғурт, Байдибек, Тўлебий туманлари ва Арис шаҳрида амалга оширилаётган лойиҳаларни инфратузилма билан таъминлаш масалалари ҳам кўриб чиқилиб, мутасадди раҳбарларга тегишли топшириқлар берилди.

Қайд этиш жоизки, ўтган йили вилоятимизда саноатни ривожлантириш ва қишлоқ хўжалиги маҳсулотларини чуқур қайта ишлашга йўналтирилган 145та сармоявий лойиҳа ишлаб чиқилди. Вилоятда янги заводлар очиш, иш ўринларини кўпайтириш борасида ишлар давом этмоқда.

– Президент жорий йилни «Ишчи касблари йили» деб эълон қилди. “Меҳнатнинг тури кўп. Кимдир ақлий фаолият билан шуғулланиб даромад топса, бошқа биров жисмоний меҳнат ортидан оила тебратади. Ҳар қайси меҳнат ҳам машаққатли ва албатта, ҳалол, тер тўкиб топилган нон уйга барака бўлиб киради. Муҳими, инсон ишсиз, даромадсиз қолмасин, тўрт мучаси соғ бўла туриб, бошқаларга боқиманда бўлмасин”, деди ёшлар билан учрашувда. Бугун муҳокама қилинган сармоявий лойиҳалар маҳаллий ишбилармонларимизга кўмак бериш орқали аҳоли бандлигини таъминлашга қаратилган. Чунончи, мамлакатимизда тадбиркорлар қанча кўп бўлса, уларнинг эркин ишлаши учун кенг шароитлар яратилса, шунча кўп одам иш билан таъминланади.