“Наврўзнома” ўн кунлиги доирасида ташкил этилган байрам тадбирлари вилоят маркази Туркистон шаҳрида “Хуш келдинг, Наврўзи олам!”  номли тантана билан якунланди

Унда сўзга чиққан вилоят ҳокими Нуралхан Кўшеров минтақа аҳолиси ва меҳмонларини баҳорги кун ва туннинг тенглашуви байрами билан табриклади.

– Барчангизни Наврўз байрами билан чин қалбимдан табриклайман! Наврўз – янгиланиш ва тўкинлик байрами! Ота-боболаримиз 5000 йилдан буён Наврўз байрамини янги йилнинг бошланиши сифатида нишонлаб келади. Тантана айнан мамлакат жанубидан бошланади.

Наврўз умумхалқ шодиёнаси – Улуснинг улуғ куни, ҳаётий кучларнинг янгиланишини ифодаловчи ушбу ёрқин байрам инсон ички олами ва табиат уйғунлиги рамзидир. Бу даврда нафақат табиатда, балки инсонларнинг кўнглида ҳам янги умид ва орзулар куртак ёзади. Гарчи бу айём ҳар йили такрорлансада, каттаю кичик уни мўъжизани кутгандек орзиқиб қаршилайди. Чунки ёшимиз ва касб-коримиздан қатъиназар, барчамиз баҳорни, баҳорий неъматларни, кўклам нафасини соғиниб яшаймиз. Анъанага кўра, Наврўз байрами келишидан аввал одамлар ўз уйларини, хонадонларини тартибга келтириб, кўчатлар ўтқаздилар. Шу нуқтаи назардан, “Тоза Қозоғистон” дастури халқимиз анъаналари билан уйғунлашган. Мен барчани табиатни асраб-авайлашга, ҳовли ва қишлоқларни тозалашга, дарахт кўчатларини экишга чақираман. Туркистонда Наврўз байрамини нишонлаш алоҳида аҳамиятга эга. Зеро, бу тарихий шаҳар халқимизнинг бешиги ҳисобланади. Яқинда давлат раҳбари Қасим-Жўмарт Кемелули “Туркистон шаҳрининг алоҳида мақоми тўғрисида”ги Қонунни имзолади. Президентимиз вилоятни ҳар томонлама ривожлантириш борасида кўрсатмалар берди. Вилоятда бу борадаги ишлар изчил давом эттирилмоқда. Янги мақом шаҳарнинг янада тараққий этишига туртки беради. “Ҳунармандлар шаҳри” барпо этилмоқда. Бундан ташқари, замонавий отчопар қурилиши давом этмоқда. Туркистон сайёҳлик марказига айланмоқда. Шаҳарнинг индустриал минтақасида янги заводлар очилмоқда. Наврўз келиши билан баҳор нафасидан борлиқ танасига қайта жон киради. 

Ёши улуғлар юртда тинчлик-осойишталик бўлсин, деҳқончилигимиз унсин, деб дуога қўл очади. Қорли-қировли кунларни даласини соғиниб ўтказган деҳқон баракали ва мўл ҳосил олиш умиди билан Наврўз палласида ерга уруғ қадайди, кўчат ўтқазади, атроф-муҳитни кўкаламзорлаштиришга интилади. Туркистон ўлкасининг меҳнаткаш аҳолиси баҳорнинг ҳар бир куни деҳқончилик учун муҳим эканини яхши билади. Жорий йилда 900 минг гектар экин майдонининг 700 минг гектари шудгорланди. 5 минг гектар майдонга эртапишар сабзавотлар экилди. Қишлоқ хўжалиги маҳсулотларини чуқур қайта ишлаш, сув тақчиллиги, суғориш каналларининг ишдан чиқиши муаммоларини ҳал этиш устида ишлаяпмиз. Пахта, маккажўхори, гўшт кластерларини ривожлантирамиз. Туркий оламнинг маданий-маънавий маркази ҳисобланган Туркистон шаҳрида ҳам Наврўз байрами юксак савияда нишонланмоқда. Наврўз фалсафаси – эзгулик тимсоли ва ватан мeҳрини мустаҳкамловчи қудратдир. Барчани байрам билан табриклаб, оилаларингизга тинчлик-хотиржамлик, фаровонлик тилайман! – деди Нуралхан Кўшеров.

Туркистоннинг энг гўзал масканларидан бирига айланган “Карвон сарой” мажмуасида одамлар гавжум бўлди. Бу ерда амалий санъат усталари ва рассомларнинг кўргазмалари ташкил этилиб, меҳмонлар халқимизнинг бой маданияти билан яқиндан танишдилар. Миллий таомлар кўргазмасида меҳмондўстлик анъаналари намойиш этилди. Миллий спорт турлари бўйича мусобақалар ўтказилиб, Наврўз байрамининг ранг-баранг анъаналари давом этди.

Концерт дастурида Қозоғистон эстрадаси юлдузлари иштирок этди. 

  ***

Вилоятимизнинг барча туман ва шаҳарларида Наврўз байрами юксак савияда уюштирилиб, одамлар ўртасида қувонч ва ҳамжиҳатлик муҳити яратилди.

Наврўз байрами муносабати билан Жетисай туманида 62 оила бошпана билан таъминланди. Байрам тадбирида туман ҳокими Серик Мамитов ва “AMANAT” партияси Жетисай туман бўлими ижроия котиби Асқар Қайназаровлар махсус иштирок этиб, хонадон соҳибларини байрам билан табриклашди.

  ***

Байрам арафасида Туркистонга Jibek Joly халқаро поездида 300 нафар сайёҳ ташриф буюрди.

Саёҳатчилар Туркистон шаҳрининг диққатга сазовор жойларини зиёрат қилиб, Наврўз байрамида иштирок этишди.

Таъкидлаш жоизки, Jibek Joly сайёҳлик йўналиши ўтган йили ишга туширилган. Саёҳат давомида йўловчилар Алмати шаҳридан бошлаб, Туркистон, Тошкент, Самарқанд ва Шимкент шаҳарларига ташриф буюриб, уларнинг диққатга сазовор жойлари билан танишишмоқда.