Давлат раҳбари Абай вилояти ҳокими Берик Уалини қабул қилди

Президентга вилоятнинг ижтимоий-иқтисодий равнақи ҳақида ахборот берилиб, келгуси даврга мўлжалланган тараққиёт режаси тақдим этилди.

Вилоят ҳокими маҳаллий бюджетнинг харажат ва даромад қисми ҳар томонлама таҳлил қилинганини таъкидлади. Натижада молиялаштиришнинг устувор йўналишлари белгиланди. Тежалган маблағ эса долзарб муаммоларни ҳал қилишга сарфланади.

Қ. Тўқаевга 2028 йилгача амалга ошириладиган 24та сармоявий лойиҳа ишлаб чиқилгани маълум қилинди. Умумий қиймати 2,2 триллион тенге бўлган ушбу ташаббуслар 8 мингдан ортиқ иш ўрнини яратиш имконини беради. Улар орасида жорий йилда олтита лойиҳа ишга туширилади.

Берик Уали вилоятдаги ижтимоий иншоотлар ва коммунал инфратузилмаларнинг ҳолати ҳақида маълумот берди. Жумладан, мактаб ва болалар боғчалари қуриш, маданият ва соғликни сақлаш муассасаларини аҳоли талабидан келиб чиқиб замонавийлаштириш режалаштирилган. Бундан ташқари, коммунал хўжалик соҳасида тўпланган муаммоларни, айниқса, Семей шаҳрининг ушбу йўналишдаги муаммоларини ҳал қилиш жуда долзарбдир.

“Бадастир мактаб” миллий лойиҳаси доирасида 5та иншоот ва “Ўқувчилар саройи“нинг қурилиши олиб борилмоқда. 

Давлат раҳбари минтақадаги ижтимоий-иқтисодий муаммоларни ҳал этиш орқали аҳоли турмуш даражасини юксалтириш зарурлигини таъкидлади. Шунингдек, вилоят ҳокимига вилоятни тараққий эттиришни жадаллаштириш йўлларини Ҳукумат билан биргаликда кўриб чиқиш, долзарб муаммоларни босқичма-босқич ҳал этиш юзасидан топшириқлар берди.