Вилоят ҳокими Н. Кўшеров Кентов шаҳри аҳолиси билан учрашув ва фуқаролар қабулини ўтказди. Учрашувда шаҳарни ривожлантириш йўллари муҳокама қилиниб, фуқароларнинг мурожаат ва таклифлари тингланди. 

– Президентимиз Қасим-Жўмарт Кемелули Ҳукуматнинг кенгайтирилган йиғилишида иқтисодиётни ранг-баранглаштириш, инфратузилмани ривожлантириш, агросаноат мажмуаси салоҳиятини юксалтириш юзасидан аниқ топшириқлар берди. Кентов шаҳрида амалга оширилаётган давлат лойиҳалари ва дастурларига қисқача тўхталсам, “Қишлоқ – эл бешиги” лойиҳаси доирасида 2024 йили 3та аҳоли манзилида 6та лойиҳа амалга оширилди. Натижада 22та кўча ўртача таъмирланди. Қарноқ қишлоғида Маданият уйи қурилиши учун 107 миллион тенге ажратилиб, ишлар бошланди. “Қишлоқ омонати” дастури доирасида 25 миллион тенгега 4та лойиҳа молиялаштирилди. 2025 йилда 477 миллион тенгега 97та лойиҳани молиялаштириш кўзда тутилган. Ўтган йили шаҳарда ялпи ҳудудий маҳсулот 13,5 фоизга ўсди. Кичик ва ўрта бизнес иншоотлари сони 6600тага етди. Уларда ишлаб чиқарилган маҳсулотлар ҳажми 8 фоизга кўпайди. Қурилиш ишлари ҳажми 9,7 фоизга, саноат соҳасида ишлаб чиқариш 20 фоизга ошди. Саноат корхоналарини очиш ва сармоя жалб қилиш борасидаги саъй-ҳаракатларни кучайтириш зарур, – деди Н. Кўшеров.

Учрашувда Кентов шаҳри ҳокими Ж. Тасов амалга оширилган ишлар ҳақида маъруза қилди, фуқароларнинг мурожаатлари ва саволларини тинглади. Кентовликларни газ билан таъминлаш, инфратузилмани такомиллаштириш, ижтимоий иншоотларни таъмирлаш, бандлик, кариз тизимини тартибга солиш, уй-жой қурилиши учун ер ажратиш каби бошқа масалалар кўтарилди. 

Н. Кўшеровнинг шахсий қабулида бўлган фуқаролар ҳам муаммолар ечимига оид жавоб олишди, қолганлари баённомада қайд этилди ва назоратга олинди.