Қозоғистон Республикаси ўзбеклари “Дўстлик” ҳамжамияти қошидаги “Ижодкор” адабий бирлашмаси аъзолари ўзбек адабиётининг ёруғ юлдузи Муҳаммад Юсуф таваллудининг 65 йиллиги муносабати билан Ўзбекистон Республикаси Андижон вилоятида ўтказилган ижодий кечада иштирок этишди.

Қозоғистон, Ўзбекистон, Қирғизистон, Афғонистон ва Тожикистон давлатлари вакиллари иштирокида ўтган халқаро анжуман шоир таваллуд топган Марҳамат туманидаги марҳумнинг қабристонидан бошланди. Қуръон ўқилиб, ўтганларнинг руҳларига дуо қилинди. Сўнгра тадбир иштирокчилари Муҳаммад Юсуф туғилган хонадонга ташриф буюришди. Бу ерда меҳмонларни илиқ кутиб олган шоирнинг оила аъзолари уй-музей билан таништиришди. 

Сўнг, “Шукрона” ресторанида маҳаллий шоирларнинг китоблари ҳамда Абдураҳим Пратов, Соатой Камол қизи, Майсара Сафарова каби бир неча ҳамюртларимиз киритилган “Golden Bridge” (“Олтин кўприк”) номи билан Ҳиндистонда нашр этилган жаҳон антологиясининг тақдимот маросими ўтказилди. “Ижодкор” адабий бирлашмасининг аъзоси Баҳодир Оташ барчани шоир таваллудининг 65 йиллиги билан табриклаб, мамлакатлараро дўстликнинг яққол кўриниши бўлмиш тадбирнинг бардавом бўлишига тилакдош эканини айтди. Тадбир давомида Муҳаммад Юсуф таваллудининг 65 йиллиги муносабати билан ўтказилган мушоира ғолиблари аниқланиб, мукофотлаш маросими бўлиб ўтди. 

Марҳаматда ўтган ижодий кечада шоирга бағишланган шеърлари турли тилларда ўқилди. Тадбир якунида 

ҳамюртимиз Майсара Сафарова шоир қаламига мансуб энг машҳур шеъри “Лолақизғалдоқ”ни қозоқ тилида ўқиб, ижодкорларнинг олқишига сазовор бўлди. 

Ўзбекистондаги Қозоғистон йили икки эл дўстлигини янада мустаҳкамлаш, адабиёт, маданият, спорт, илм-фан ва бошқа соҳаларда тажриба алмашиш учун кенг имкониятдир. 

Ўзбек-қозоқ дўстлиги расмий белгиланган бир йил давомидагина эмас, абадий давом этсин!