Қозоғистон 2026 йилги Дунёвий  тинчлик индекси (“Global Peace Index”) натижаларига кўра, дунёдаги энг тинч давлатлар қаторидаги ўрнини мустаҳкамлади. Мамлакат мазкур рейтингда 44-ўринни эгаллаб, ўтган йилга нисбатан беш поғона юқорилади.

Иқтисодиёт ва тинчлик институти (“Institute for Economics and Peace”) томонидан эълон қилинган рейтингда жаҳоннинг 163та мустақил давлати баҳоланган. Таҳлил жараёнида жиноятчилик даражаси, ички барқарорлик, жамоат хавфсизлиги, можаролар хавфи ҳамда ҳарбийлашув даражаси каби 23та асосий мезон инобатга олинган.

Натижаларга кўра, Қозоғистоннинг тинчлик индекси 1,771 баллни ташкил этди. Бу кўрсаткич мамлакат  дунёнинг энг тинч ва хавфсиз 50 давлати қаторига киришини таъминлади.

Марказий Осиё давлатлари орасида энг юқори натижани Ўзбекистон қайд этди. Мамлакат 37-ўринни эгаллаб, бир йил ичида ўн поғона юқорилади. Қозоғистондан кейин Тожикистон 47-ўрин, Қирғизистон 61-ўрин ва Туркманистон 66-ўриндан жой олди.

Собиқ иттифоқ мамлакатлари ичида энг улкан юксалиш  Арманистон ҳиссасига тўғри келди. Мамлакат рейтингда 21 поғона юқорилаб, 51-ўринни эгаллади.

Жаҳон рейтингида биринчи учликдан Исландия, Янги Зеландия ва Швейцария ўрин олган. Аксинча, рейтингнинг қуйи қисмида Украина ва Россия қайд этилган.

Мутахассислар фикрича, Қозоғистоннинг халқаро рейтингдаги юқори натижаси мамлакатда ижтимоий барқарорликни таъминлаш, жамоат хавфсизлигини мустаҳкамлаш ва тинчликпарвар ташқи сиёсат юритиш борасида амалга оширилаётган изчил чора-тадбирлар самарасини кўрсатади.