Тўлебий тумани ҳокимлиги ва таълим бўлими ҳамкорлигида  Ватан ҳимоячилари куни  ва Буюк Ғалаба байрами арафасида байрам тадбирлари  ўтди. Маросимларда туман ҳокими Тўлеген Телғараев ва туман  маслаҳати раиси Нурлан Қўйбағаров, ҳарбий хизматчилар, фахрийлар ва туман жамоатчилиги иштирок этиб, “Мангу олов” ёнида Улуғ Ватан урушида ҳалок  бўлган ҳамюртларимиз хотирасини бир дақиқа сукут билан эслашди.

Тадбир  «Ғалаба» боғидаги  «Данқ» ёдгорлигига гулчамбар қўйиш маросими билан бошланди. Туман ҳокими аҳолини байрам билан табриклаб, Ватан ҳимоячиларининг мардонавор меҳнатини алоҳида таъкидлади.

– Сизларни 7 май – Ватан ҳимоячилари куни ва Буюк Ғалабанинг 78 йиллиги билан чин қалбимдан табриклайман. Бу байрам мардлик ва ва жасорат рамзидир. Доно халқимиз “Юртинг учун ўтга кир, куймайсан”, дейди. Ватанни ҳимоя қилиш инсон учун шарафли бурчдир. Қўлига қурол олиб, озодлик ва истиқлолимизни, ўз Ватанимизни ташқи душманлардан ҳимоя қилган мардларнинг жасоратини ҳеч қачон унутмаймиз ва фахрланамиз, – деди туман раҳбари.

Байрам тадбири доирасида ватанпарварлик руҳидаги куй-қўшиқлар янгради, Ватан учун курашда ҳалок бўлган аскарлар руҳига Қуръон тиловат қилинди.