Вилоят маслаҳати раиси Н. Абишов раҳбарлигида ўтган тезкор йиғилишда  вилоят бюджетидан Зараркунанда ҳашаротларга қарши биологик ҳамда кимёвий кураш учун ажратилган 640 млн. тенгенинг тендерда ғолиб чиққан 8 та фирма томонидан мақсадли ўзлаштирилиши масаласи муҳокама қилинди. Асосан, Россияда тайёрланган кимёвий воситалар харид қилиниб, қўлланилади.

Чордара ва Ўтрор туманидан сайланган депутатлар мазкур масала юзасидан олимлар ва пудратчи фирмаларга танқидий фикрларини билдирди. Вилоятимизда Сирдарё ўзани ҳамда сув омборларига яқин ҳудудлар – жами 6492 гектар майдонга биологик ва кимёвий ишлов берилиши керак. Жараён бошланганига 40 кундан ошди. Вилоят ҳудудида рўй берган кучли шамоллар туфайли масала кейинга қолдирилган бўлса ҳам кунлар исиши ҳамоно муаммо яна бўй кўрсатади. Вилоят энергетика, уй-жой коммунал хўжалиги бошқармаси бошлиғи ўринбосари Б. Пўлатбеков, зоология институти илмий ходими Қ. Кўшкимбаев, миллий таҳлил маркази биологи М. Халиқова маърузаларидан сўнг иш натижасидан қониқмаган депутатлар пудратчиларга саволлар ёғдиришди. Ҳатто, маблағ тежалиши ва мақбул натижа учун дронлардан фойдаланишни ҳам тавсия қилишди. Йиғилиш раиси Н. Абишов томонларни тинглаб, олимлар, мутахассислар ҳамда пудратчи фирмалар вакилларига мурожаат қилиб, хулосаларини баён этди.

– Бюджет маблағи ўринли сарфланиши керак, бунинг учун барчамиз масъулмиз. Халқ биздан ажратилган маблағнинг ижобий самарасини, хусусан, зараркунандаларнинг йўқолишини амалда кутади. Сизлар белгиланган вазифани ёруғ юз билан адо этиб, ҳамюртларимизнинг олқишига сазовор бўлишингизга ишончим комил, – деди раис.