Ўрдабоши туманида жорий йилнинг январь-март ойларида қишлоқ хўжалиги соҳасида 7,7 млрд. тенге миқдорида маҳсулот етиштирилди. Жумладан, жорий йили 70,4 минг гектар ерда қишлоқ хўжалиги экинларини етиштириш режаси 93 фоиз уддаланди. Буни туман ҳокими Нурбек Бадирақов деҳқон хўжаликлари иштирокида ўтган семинарда маълум қилди.

Шубар қишлоғидаги “Шубар” деҳқон хўжалигининг экинзорида ўтган семинарда минерал ва органик ўғитлар, сифатли уруғ ва қишлоқ хўжалиги техникаларининг кўргазмаси ҳам уюштирилди. 

– Бугунги кунда мўл ҳосил олиш учун турли органик ва минерал ўғитлар фойдаланишга татбиқ этилмоқда. Вақт, ишчи кучини кўп талаб қилмайдиган, намликни узоқ вақт сақлаб туришга имкон берадиган техникалар пайдо бўлмоқда. Минтақадаги баъзи хўжаликлар илғор технологиялардан фойдаланиб, яхши кўрсаткичларга эришмоқда. Масалан, кўргазмада Европада ишлаб чиқарилган уруғ сепадиган ускунани кўрдик. У бешта вазифани бажара олади –  бир кунда 50 гектар ерга уруғ қадаши мумкин. Дрон 6-7 дақиқада 1 гектар майдонни дорилашга улгуради. Илғор технологиялардан фойдаланиш – бугунги кун талаби. Бундан ташқари, тайёр маҳсулот ишлаб чиқаришни йўлга қўйишимиз зарур, – деди туман ҳокими.