Чегарачилар куни муносабати билан Жетисай шаҳрининг марказий майдонида “Қўрғони сен элимнинг” мавзуида тантанали тадбир ўтди. Унда Жетисай тумани ҳокими ўринбосари Марат Айнабеков, шаҳар ҳокими Нурлибек Бахтияров, чегарачилар ва шаҳар аҳолиси иштирок этди.

– Ҳурматли зобит ва аскарлар, чегара хизмати фахрийлари! Сизларни касбий байрамингиз билан чин қалбимдан табриклайман! Мамлакатимиз миллий хавфсизлигини таъминлаш, элимиз давлат чегарасини қўриқлаш борасидаги саъй-ҳаракатларингиз беқиёсдир. Сизга машаққатли, шарафли ва масъулиятли ишларингизда муваффақият, мустаҳкам соғлик, куч-қувват тилаймиз! Масъулиятли хизматингизда ютуқларга эришаверинг! Юртимиз омон, сарҳадларимиз тинч бўлсин, – деди Марат Айнабеков. Шундан сўнг у бир гуруҳ чегарачиларни туман ҳокими Серик Мамитовнинг ташаккурномалари билан тақдирлади.

Чегарачиларнинг касб байрамини муносиб нишонлаш мақсадида ташкил этилган тадбирда туман Маданият уйи ходимларининг ватанпарварлик руҳидаги куй-қўшиқлари янгради. Шунингдек, чегарачилар ҳам ўзларининг санъати билан йиғилганларга кўтаринки кайфият бағишлади.