“AMANAT” партиясининг Қоратов туман филиали ижроия котиби Есмахан Бертаев ва Шимкент шаҳар маслаҳати депутати Лазиз Сулаймонов Сайрам даҳасидаги “Сайрам” тиббиёт коллежига ташриф буюриб, талабалар билан учрашув ўтказишди.

Коллеж директори Жанара Амирханқизи меҳмонларни таълим жараёни билан таништириб, уларга амалий машғулотлар, муассасанинг ўқув-лаборатория базаси ҳамда ёшлар учун яратилган шарт-шароитлар ҳақида маълумот берди. Дарҳақиқат, бугунги кунда муассасада тиббиёт соҳасининг турли йўналишлари бўйича малакали ўрта бўғин кадрлар тайёрланмоқда.

Е. Бертаев таълим тизимида амалга оширилаётган ислоҳотлар, айниқса, ёшларнинг касбий етуклиги ва ижтимоий фаоллигини таъминлашга қаратилган чора-тадбирларга тўхталди:

– Юртимизда ёшларнинг касб эгаллашлари, билим ва кўникмаларини мустаҳкамлашлари учун барча шароитлар муҳайё. Президентимиз таъкидлаганидек, келажак – ёшларники. Биз уларни ҳар томонлама қўллаб-қувватлаб, масъулиятли ва ватанпарвар авлод сифатида тарбиялашимиз зарур, – деди у.

Шунингдек, Л. Сулаймонов таълим соҳасидаги долзарб масалаларга тўхталиб, тиббий кадрларини тайёрлашда халқаро тажриба ва инновациявий ёндашувларнинг аҳамияти ҳақидаги фикрларини илгари сурди:

– Бугунги кунда тиббиёт соҳаси жадал ривожланмоқда. Ёшлар замонавий билимларни ўзлаштириши, ахборот технологияларидан унумли фойдаланиши, чет эл тажрибасини ўрганиши зарур. Бу халқаро андазаларга жавоб берадиган, рақобатбардош мутахассисларни етиштиришимизда муҳим омил бўлади.

Тадбирда талабалар ўзларини қизиқтирган саволлар билан мурожаат қилиб, меҳмонлар билан очиқ мулоқот олиб бордилар. Жумладан, ёшлар учун амалиёт имкониятлари, таълим сифатини ошириш, академик сафарбарлик ва илмий фаолликни рағбатлантириш масалалари муҳокама қилинди.

Учрашув якунида меҳмонлар коллеж жамоасига миннатдорчилик билдириб, ёшларни изланишдан тўхтамаслик, юксак орзу-мақсадлар сари интилиш, ватан равнақи учун билим ва меҳнатларини аямасликка чақирдилар.