Улуғ Ватан уруши ўтган йигирманчи асрдаги эмас, балки инсоният тарихидаги энг катта шафқатсиз ва қонли қирғинбарот жанг эди.

Буюк Ғалаба эса улуғ байрам, шодиёна. Албатта, ҳар бир тантананинг ўз ўрни, ўзига хос аҳамияти бўлиши табиий. Бироқ Ғалаба шодиёнасининг ўрни ўзгачалигини қалбан ва руҳан ҳис қилмоғимиз даркор.

2025 йил ўзгача давр. Бу йил Улуғ Ватан урушидаги Ғалабанинг 80 йиллигини кенг кўламда, улуғвор қиёфада нишонлаймиз. Бу сизу бизнинг умумий тарихимиздаги муҳим, аҳамияти залворли байрам. Қақшатқич, қонли жангларда қаҳрамонлик кўрсатган миллонлаб СССР аскарлари сафида қозоғистонликлар ҳам мардонавор жангларда жон олиб, жон беришди, қонли тўқнашувларда жасурлик намуналарини намоён этишди. Бауржан Мўмишули айтгандай, қозоқ эли, барча қозоғистонликлар фашизмга қарши қонли жангларда қаҳрамонликнинг ҳақиқий қирраларини кўрсата олишди.

Жанубий Қозоғистон вилоятидан Улуғ Ватан урушига 140 мингдан зиёд одам отланган булса, уларнинг деярли ярмиси киндик қони томган юртга қайтиб келмади. Вилоятимиздан жанггоҳларда қон кечган, жон олиб, жон берган 51 нафар жангчига Совет Иттифоқи Қаҳрамони юксак унвони берилган. Саккиз аскар “Шуҳрат” орденининг соҳибига айланган.

Шунингдек, Сайрам туманидан тўрт нафар жасур жангчи – В. Вишневецский, З. Ҳусанов, Т. Рустамов ва Б. Содиқовлар ҳам Совет Иттифоқи Қаҳрамони унвонига ноил бўлиб, улуғланишди. Қорабулоқ қишлоғидан икки мингга яқин йигит урушга отланган бўлса, ярмиси оила бағрига қайтиб келмади. Ҳамқишлоғимиз Тоштемир Рустамов Совет Иттифоқи Қахрамони унвонига сазовор бўлганини юқорида айтиб ўтдик. 

Буюк Ғалабанинг 80 йиллиги доирасида қатор кечалар, тадбирлар, уруш фахрийларига таъзим, уларнинг жанггоҳлардаги кўрсатган қаҳрамонликларини ёдга олиб, ҳурмат кўрсатиш, бугунги дориломон ҳаётимиз ўша катта авлод вакилларининг жасорати туфайли эканлигини ёш авлодга тарғибот ва ташвиқот қилиш ватанпарварлик тарбиянинг ўзагидир.

Қозоғистон халқи Ассамблеясининг аъзоси, Сайрам туман маслаҳатининг депутати Муҳиддин Сиддиқов раҳбарлик қилаётган 100-сонли умумий ўрта мактабнинг ҳовлисида қишлоғимиздаги УВУ фахрийларининг фарзандлари, неваралари,  ёшлар иштирокида “Фахрийлар истироҳат боғи” очилди.

Байрамона тадбирда иштирок этган “AMANAT” партияси Сайрам туман бўлимининг ижроия котиби Қуаниш Сиздиқов, меҳнат фахрийси, Түркистон вилоят Жамоатчилик кенгаши аъзоси Бахтиёр Шомуродов, Сайрам туманининг Фахрий фуқароси Сайдаҳмад Аҳмедов, Семей полигони фахрийси Абдулла Аҳмедовлар мамлакатимизда осойишталикни таъминлаш, Мустақиллигимиз, тинчлигимизни сақлаш юртимиз фуқароларининг муқаддас бурчи эканлигини таъкидлашди. 

100-сонли таълим масканида очилган “Фахрийлар истироҳат боғи” фронтчи ота-боболаримизга ҳурмат рамзи бўлиб, ёшларда ватанпарварлик руҳи, тарбияси шаклланишида дастуриламал бўлади.

Буюк Ғалабанинг 80 йиллик шодиёнаси муборак булсин! 

Юртимиз тинч, осмонимиз мусаффо булсин!