Вилоят хўжаликлари қовун етиштиришда янгича усулдан фойдалана бошлади. Яъни, экинларни суғормай, мўл-ҳосил олиш мумкинлигини исботлашди. Жанубдаги 45-50 даража иссиқда бир томчи сув ичмаган қовунлар мазали ҳамда йирик ҳосил берган. 

Деҳқонларнинг айтишича, қишлоқ хўжалигидаги ушбу усулни ота-боболаримиз қўллаган.

– Йилдан-йилга обикор сув масаласи муаммога айланмоқда. Шу боис, ота-боболаримиз тажрибасини амалда қўллашга бел боғладим. Баҳорнинг илк ойларида обикор сув ҳеч кимга кераксиз вақтдан фойдаланиб,  февраль ойида экин майдонимни кўллатиб, суғордим. Сўнг қовун экдим. Июль ойидаги 45-50 даража иссиқда ҳам суғормадим. 120 кун сув ичмади. Натижа кутилгандан зиёда бўлди, – дейди деҳқон Азизхон Эгамбердиев.

Қарноқ қишлоғида деҳқончилик қилаётган хўжалик 4 гектарда қовун, бир гектарда тарвуз етиштиради. Маҳсулотини маҳаллий бозорга чиқаради. Деҳқоннинг айтишича, бу усулни ҳар қандай қовун навини етиштиришда фойдаланса бўлади. Келажакда у экин майдонини кенгайтиришни режалаштирган. Қовундан мўл ҳосил олса, хориж бозорларини ҳам забт этишни ният қилган.