ҚР Бош вазири ўринбосари Серик Жуманғарин вилоят ҳокими Дархан Сатибалди билан бирга Туркистон вилоятининг бизнес ҳамжамияти билан учрашув ўтказди. Эркин шаклда ўтган йиғинда ишлаб чиқариш, маҳаллий ишлаб чиқарувчиларни қўллаб-қувватлаш тадбирлари ва қайта ишлаш соҳаларини ривожлантириш масалалари муҳокама қилинди. 

Минтақага сармоя жалб қилиш мақсадида йирик лойиҳалар амалга оширилмоқда. Бош вазир ўринбосарига Келес туманидаги йирик иссиқхона лойиҳаси таништирилди. Унинг доирасида 42 млрд. тенге сармоя жалб қилиниб, кунгабоқар етиштириш йўлга қўйилади, 51 гектардан зиёд иссиқхона барпо этилади. Иссиқхона қурилишининг биринчи босқичида мингга яқин одам иш билан таъминланади. 

Вилоятимизда мамлакатимиздаги энг йирик нефтни қайта ишлаш заводи қурилмоқда. Келгуси йилда фойдаланишга топшириладиган “Standart Petroleum & Co” компанияси қуввати 2 миллион тонна нефтни қайта ишлаш лойиҳасини юритмоқда.

Вилоятимизда қиймати 722 млрд. тенгелик «Ўгам дарёсида сув электр станцияларининг каскади» барпо этилмоқда. Мазкур лойиҳа тўлиқ ишга туширилса, вилоят жанубидаги аҳоли ичимли сув  билан таъминланади. Вилоятимизда 136,6 млрд. тенгелик кимё мажмуаси барпо этилмоқда. У ерда минг нафарга яқин киши иш билан банд бўлади.

Учрашув давомида пахтани қайта ишлаш ва қишлоқ хўжалиги соҳасида амалга ошадиган лойиҳалар таништирилди. Айниқса, тўқимачилик кластерини ривожлантиришга эътибор кучайтирилган. 

– Мақсадимиз – янги корхоналар очиш орқали иш ўринлари яратиш. Ишлаб чиқариладиган маҳсулотлар сонини кўпайтириш, аҳоли даромадларини ошириш. Бюджет маблағига ишониб ўтиришнинг вақти эмас. Сармоя киритишни истаганлар билан ҳамкорликка тайёрмиз, – деди Дархан Сатибалди.