Астана шаҳрида ўтган “Қозоғистоннинг энг яхши маҳсулотлари” республика кўрик-танловида 180та корхона вакиллари иштирок этди, улардан 9 нафари туркистонлик тадбиркорлар. Анъанавий кўргазма-ярмаркада энг сара маҳсулотлар шаҳар аҳолиси ва меҳмонлари эътиборига ҳавола этилиб, танлов ғолиблари аниқланди.

“Энг яхши халқ истеъмоли маҳсулотлари”, “Энг яхши озиқ-овқат маҳсулотлари” номинациялари бўйича ғолиблар аниқланди.

Вилоят миқёсида энг яхши корхона, деб эътироф этилган “Энг яхши саноат маҳсулотлари” номинацияси ғолиблари – “Мega-Agat” МЧБ, “Кентов трансформатор заводи” ва “Батсу Водоканал” МЧБлар танловда минтақамиз шарафини ҳимоя қилишди. Шунингдек, “Энг яхши халқ истеъмоли маҳсулотлари” номинацияси ғолиблари – “Бекзат Бак” МЧБ, “Аsia Brand” ХК, “Арай” ИЧШ, “Энг яхши озиқ-овқат маҳсулоти” номинацияси бўйича ғолиб – “Балмұздақ” МЧБ, “Майлыкент Сүт” ҳамда “Алекс” МЧБнинг маҳсулотлари ҳам тақдим этилди.

Шунингдек, пойтахтимиз аҳолиси ва шаҳар меҳмонлари “Бир қишлоқ – бир маҳсулот” лойиҳаси бўйича “Қозоғистоннинг энг яхши маҳсулоти – 2023” ҳудудий кўргазма-танловида иштирок этган тадбиркорлар маҳсулотларига катта қизиқиш билдиришди.