Келес туманида Туркистон вилоятининг ташкил топганига 5 йил, шунингдек, “Келес” халқ театрига 45 йил тўлиши муносабати билан халқ театрлари орасида вилоят фестивали уюштирилиб, натижалари эълон қилинди.

Туркистон вилоятидаги ўн битта халқ театри иштирок  этган фестивалда театрнинг илк тамал тошини қалаган, санъат соҳасида хизмат кўрсатган фахрийлар қизил йўлак орқали саҳна тўрига таклиф қилинди. 

Танлов ғолиблари ва совриндорларни тақдирлаш тадбирида вақтинча Келес тумани ҳокими вазифасини бажарувчи Даурен Сариев ва туман маслаҳати раиси Нуржан Шаулиев иштирок этиб, театр жамоаларига махсус мукофотлар билан туман ҳокимининг махсус совринини топширди.

Ҳакамлар ҳайъатининг қарори билан Ўтрор туманидан келган “Ўтрор” халқ театри бош совринга эга бўлса, биринчи ўринга “Сўзоқ” халқ театри муносиб топилди. Иккинчи ўрин маҳаллий “Келес” халқ театри ва Ўрдабоши туманининг “Ёш тўлқин” болалар ва ўсмирлар театрига, совринли учинчи ўрин Тулкибош туманидан келган “Мақтали” ҳалқ театрига насиб этди.