Туркистон шаҳрида туркий халқлар ҳунармандларининг “Шарқ бозори” анжумани ўтди. Халқаро тадбирнинг очилиш маросимида вилоят ҳокими Дархан Сатибалди иштирок этиб, кўргазма билан танишди.

Туркистонга туркий оламнинг сайёҳлик пойтахти мақоми берилиши муносабати билан ташкил этилаётган симпозиумда Туркия, Ўзбекистон, Озарбайжон, Қирғизистон, Тожикистон ва мамлакатимизнинг бошқа вилоятларидан ҳунармандлар иштирок этди.

Тадбирда Туркистон вилояти санъат усталари иштирокидаги концерт дастури намойиш этилди. Шамши Қалдаяқов номидаги вилоят филармонияси санъаткорлари анъанавий ва халқ қўшиқларини ижро этишди. 

Симпозиум иштирокчилари заргарлик, кулолчилик, тўқимачилик, миллий либослар тикиш, тикувчилик, каштачилик, кигиздўзлик, ёғоч ўймакорлиги, терини бадиий қайта ишлаш каби ҳунармандчилик ва бошқа йўналишлардаги тадбирларда иштирок этишди. Шу билан бирга, ҳунармандларнинг кўргазма-ярмаркаси, ўзаро тажриба алмашиш тадбирлари, маҳорат сабоқлари ташкил этилди.

Ушбу кўргазма-ярмаркани ўтказишдан кўзланган мақсад – туркий халқларнинг миллий ҳунармандчилиги ва халқ бадиий ва амалий санъатини ривожлантириш, соҳа вакилларини ҳар томонлама қўллаб-қувватлаш борасида амалга оширилаётган мажмуавий чора-тадбирларини давом эттириш, фойдаланилмаётган имкониятларни тўла ишга тушириш эди. Шунингдек, ҳунармандлар ўртасида ўзаро тажриба алмашиш тизимини янада кенгайтириш, ҳунармандчилик маҳсулотлари учун янги бозорларни топиш борасида қўшимча чораларни кўриш, тажриба алмашиш ва маҳорат сабоқлари ўтказиш, туркий давлатлар ўртасидаги алоқаларни янада мустаҳкамлаш ва сайёҳликни ривожлантиришга ҳисса қўшиш мақсадида маданий алоқаларни ривожлантиришга ҳам алоҳида эътибор қаратилди.