Туркистон вилоятининг асосий иқтисодий йўналишларидан бири – сайёҳлик соҳаси. Минтақада даволаш-соғломлаштириш сайёҳлигининг салоҳияти юксак. 

Туркистон шаҳрида Сариоғоч курорт минтақасини ривожлантиришга бағишланган мажлис ўтди. Унда мутасадди бошқарма ва сармоявий муассасалар ҳамда “Атамекен” МТП вакиллари, шунингдек, санаториялар раҳбарлари иштирок этишди.

– Ҳозирги кунда вилоятда турли тоифадаги 72та даволаш-соғломлаштириш муассасалари сайёҳларга хизмат кўрсатмоқда. Сариоғоч туманидаги артезиан ҳовузи қошида даволаш-соғломлаштириш мақсадида 57та сиҳатгоҳ фаолият юритмоқда. Ушбу йўналишда дам олувчиларнинг сони 2022 йил натижаларига кўра, 142,5 минг кишини ташкил этса, 2023 йилда 10 фоизга ошган. Вилоят ҳокими Дархан Амангелдиули курортли ҳудудни янги давр талабларига мос равишда ривожлантиришни кўзда тутилганини таъкидлади.

Сариоғоч тумани ҳокимининг ўринбосари Нурпўлат Талипов маърузасида оромгоҳларнинг тараққиётига тўхталди. “Туркистан” ижтимоий-тадбиркорлик корпорация” ҲЖ раиси ўринбосари Асланбек Исахов тадбиркорларни қўллаб-қувватлаш, шунингдек, молиялаштириш манбалари ҳақида маълумот берди.

Сариоғоч нафақат Туркистон минтақасида, балки Қозоғистоннинг даволаш-соғломлаштириш туризмини ривожлантиришга ҳисса қўшиб келаётган ягона ҳудуд. Курорт сайёҳлигини ривожлантириш мақсадида иссиқ сув манбалари, ер масаласи, сиҳатгоҳ қошидаги кичик тадбиркорликни ривожлантириш, хизматлар сифатини ошириш мақсадида “Халқаро бозорга сифатли тиббий сайёҳликни шакллантириш бўйича ягона тараққиёт дастури” ишлаб чиқилмоқда.