Сайрам туманининг Оқсувкент қишлоғида вилоят Жамоатчилик кенгашининг навбатдаги ўттиз учинчи йиғилиши ўтди.

Унда ҚР уюшган жиноятчиликка қарши ҳаракат Агентлиги Туркистон вилояти бўйича департаменти раҳбарининг биринчи ўринбосари Н. Аринбаев, Сайрам тумани ҳокими А. Сабитов, Тўлебий тумани ҳокими Т. Телғараев ва бошқалар иштирок этдилар. Тадбирни туман ҳокими А. Сабитов очди, Жамоатчилик кенгаши раиси Б. Жилқишиев йиғилиш кун тартиби билан таништирди. 

Тадбирда дастлаб Сайрам туманида ветеринария соҳасидаги давлат сиёсатининг ижроси тўғрисидаги масала кўрилди. Бу ҳақда вилоят ветеринария бошқармасининг “Ветеринария хизмати” муассасаси туман филиали раҳбари Б. Абдихаев маъруза қилди. Шунингдек, Жамоатчилик кенгашининг қишлоқ хўжалиги, қурилиш ва коммунал соҳалар тараққиёти бўйича комиссияси раиси Қ. Керимбеков ва вилоят ветеринария бошқармаси раҳбари Ғ. Қурманбай қўшимча маъруза қилдилар. 

Шундан сўнг ҚР уюшган жиноятчиликка қарши ҳаракат Агентлигининг Туркистон вилояти бўйича департаменти Огоҳлантириш бошқармаси раҳбари ўринбосари С. Асилбек ижтимоий аҳамиятга молик озиқ-овқат маҳсулотлари нархини барқарорлаштириш жамғармасининг фаолияти тўғрисида маъруза қилди. 

Мазкур масала хусусида “Туркистон” ижтимоий-тадбиркорлик корпорацияси” ҲЖнинг “Озиқ-овқат маҳсулотларини барқарорлаштириш жамғармаси департаменти” директори Л. Жанасбаева ҳам маълумот берди.

Шундан сўнг белгиланган муддатда битмагани учун уюшган жиноят эҳтимоллар харитасига киритилган Тўлебий туманининг Қўстўбе ва Хонариқ қишлоқларидаги кўприкларнинг ҳолати тўғрисида ҚР уюшган жиноятчиликка қарши ҳаракат Агентлигининг Туркистон вилояти бўйича департаменти Огоҳлантириш бошқармаси раҳбари ўринбосари С. Асилбек ва Тўлебий тумани ҳокими Т. Телғараевларнинг маърузалари тингланди.

Йиғилишда, шунингдек, қатор бошқа масалалар муҳокама қилинди.