Туркистон шаҳридаги “Дўстлик уйи”да вилоят ЎЭМБ кенгаш аъзолари иштирокида ҳайъат мажлиси ўтди. Тадбирни вилоят ўзбек этномаданият бирлашмаси қошидаги Оқсоқоллар кенгаши раиси Зуппархон Чолдонов олиб борди.

Кун тартибига кўра, мажлисда ҚХАнинг 30 йиллиги, Буюк Ғалабанинг 80 йиллиги, Давлат раҳбарининг “Ана тілі” газетасига берган мусоҳабаси, 1 Март – Шукрона кунига тайёргарлик ҳамда дастлабки ярим йиллик тадбир режасига доир масалалар муҳокама қилинди.

Дастлаб, кенгаш аъзолари ўтган йили вилоят марказида фойдаланишга топширилган “Дўстлик уйи” фаолияти билан танишишди.

Тадбирда Давлат раҳбарининг “Ана тілі” газетасига берган мусоҳабаси бўйича вилоят ЎЭМБ раиси ўринбосари Бахтиёр Шомуродов сўзга чиқиб, Президент белгилаган асосий устувор вазифалар, яъни, минтақаларни тараққий эттириш йўналишлари, фуқароларнинг ўртача умр кўриш давомийлигини ошириш ҳамда иқтисодиётни рағбатлантириш каби асосий мавзуларга алоҳида тўхталди. Шунингдек, бирлашма раисининг ҳуқуқий масалалар бўйича маслаҳатчиси Санобар Самиева меъёрий-ҳуқуқий ҳужжатларни янгилаш масалаларини тилга олди.

Туркистон шаҳар ЎЭМБ раиси Райимжон Қўчқоров ташаббуси билан ташкил этилган “Үлес” хайрия жамғармасининг фаолияти ҳамда келгуси режалари ва жамият ҳаётидаги муҳим масалалар муҳокама қилинди.

Хусусан, давлат тили нуфузини ошириш, тўй-ҳашамларда исрофгарчиликнинг олдини олиш, ёш оилаларнинг бузилишига йўл қўймаслик ҳамда маънавий қадриятларимиз – тил, маданият ва анъаналарни асраб-авайлаш масалалари айтилди.

Кенгаш аъзолари томонидан билдирилган фикр-мулоҳазалар, таклифлар инобатга олиниб, бу борада “Бир ёқадан бош чиқариб, иш юритиш” зарурлиги таъкидланди.

Шунингдек, тадбирда “Жанубий Қозоғистон” вилоят газетаси бош муҳаррири Райимжон Алибоев 34 йилдан буён муштарийлар қалбидан жой олиб, эл бирлиги ва ҳамжиҳатлиги йўлида фаолият юритаётган нашрнинг ўқувчилари ва жонкуярларига миннатдорчилик билдирди. Шунингдек, у ҳамжиҳатлик, тинчлик-тотувликни асраб-авайлаш йўлида этномаданият бирлашмалари вакилларининг ижтимоий тармоқлардаги фаоллигини жонлантириш зарурлигига эътибор қаратди.

Учрашувда вилоят ижтимоий тараққиёт бошқармаси “Жамоат тотувлиги” ДКК раҳбари ўринбосари Ерназар Баевтов ҚХАнинг 30 йиллиги доирасида амалга ошириладиган тадбирларни юксак савияда ўтказиш лозимлигини таъкидлади.

Тадбир якунида вилоят ўзбек этномаданият бирлашмаси раиси Баҳодир Ирисметов йиғилишда билдирилган фикр-мулоҳазалар асосида самарали ишлар давом эттирилишига ишонч билдирди.