Вилоятимизда фойдаланилмаётган 70 минг гектардан зиёд қишлоқ хўжалиги ерлари давлатга қайтарилди. Вилоятда умумий яйловларни давлатга қайтариш бўйича фаол ишлар олиб борилмоқда. Вилоят ҳокимлигида ўтган йиғилишда бу борадаги масалалар муҳокама қилинди. Минтақа раҳбари Нуралхан Кўшеров яйловларни давлат тасарруфига қайтариш тадбирларини кучайтириш юзасидан топшириқ берди.

Аҳолини яйловлар билан таъминлаш масаласи ҚР Президентининг яйловларни қишлоқ аҳолисига қайтариш тўғрисидаги фармойиши доирасида амалга оширилмоқда. Яйловларнинг тақчиллиги муаммосини ҳал этиш асосий вазифадир.

– Президентимизнинг яйловларни аҳолига қайтариш тўғрисидаги фармойиши доирасида аҳолини ўтлоқлар билан таъминлаш борасида кенг қамровли ишлар олиб борилмоқда. Туман ва шаҳарлар ҳокимлари мутасадди бошқармалар билан биргаликда бу борадаги ишларни янада кучайтириши зарур. Бошқа мақсадларда фойдаланилаётган ерларни қайтариш тизимли равишда амалга оширилиши зарур. Фазовий мониторинг натижаларини ўрганиб, таҳлил қилиш керак. Аҳоли ўртасида мониторинг, илмий-тадқиқот ва тушунтириш ишлари тўхтамаслиги керак, – деди Нуралхан Кўшеров.

Йиғилишда вилоят ер муносабатлари бошқармаси бошлиғи Ерғали Тилегеннинг ҳисоботи тингланди. Унга кўра, вилоятнинг умумий ер жамғармаси 11 миллион 610,3 минг гектарни ташкил этади. Фойдаланилмаётган қишлоқ хўжалиги ерларини ва ноқонуний фойдаланилаётган ер участкаларини давлатга қайтариш учун вилоят ҳокимининг фармойиши билан идоралараро ишчи гуруҳ таркиби тасдиқланди. Айни пайтда 70,9 минг гектар ер қайтарилди.

2023 йил бошида вилоятда яйловлар танқислиги 2122,2 минг гектарни ташкил қилди. Амалга оширилган тадбирлар туфайли яйловлар танқислиги 2024 йилда 608 минг гектарга қисқарди.