Республика куни арафасида кам таъминланган оилаларга “Үлес” хайрия жамғармасининг саъй-ҳаракатлари билан яна иккита уй фойдаланишга топширилди. Улардан бири – 4 фарзандли туркистонлик Ф. Аҳмаджонова. 

Умр йўлдоши вафот этган. Тўрт хонали янги уйга кўчиб ўтган хонадон соҳибасининг фарзандлари билан қувончининг чеки йўқ. Уйни соҳибларига топшириш тантанасида вилоят ижтимоий тараққиёт бошқармаси “Жамоат тотувлиги” коммунал корхонаси раҳбари ўринбосари Ерназар Баетов, вилоят, шаҳар оқсоқоллар жамоат ташкилотлари раҳбарлари, фахрий отахонлар ва ОАВ вакиллари иштирок этди. 

Яна бир уй Саврон туманига қарашли Югнак қишлоғидаги муҳтож оилага берилди. Қишлоқ фаоллари билан мактабни 2004 йили тамомлаган собиқ синфдошлар ҳамкорликда муҳтож оилага янги уй қуриб берди. Хонадон соҳиби А. Ҳайдаров ҳимматли инсонларга миннатдорчилик билдириб, дуо қилди. 

Тадбирда қишлоқ ўзбек этномаданият бирлашмаси раиси, олим Иброҳим Отажонов иштирок этди. 

– Муҳтожларга мададкор бўлган, хайрли ишга ёрдам берган барча тадбиркорларга, усталарга ва ҳимматли ҳамюртларимизга миннатдорчилик билдираман. Келгуси ярим йилликка обуна давом этмоқда. “Жанубий Қозоғистон” газетасига 200 нусха обунани уюштирдик. Шимкент шаҳри, Сайрам тумани ва бошқа шаҳар, туманлар хайрия ташкилотларини ҳам обунага ҳисса қўшишга чақираман.