Жетисай туманини 2030 йилгача ривожлантириш режаси вилоят ҳокими Дархан Сатибалди иштирокида муҳокама қилиниб, тасдиқланди. Тумандаги устувор вазифалар белгиланиб, тегишли топшириқлар берилди. Минтақа раҳбари туман ҳокимига янги ишлаб чиқариш корхоналарини очиш, сувни тежайдиган технологияларни жорий этиш, қишлоқ хўжалигини ривожлантириш, қайта ишлаш саноатини жонлантириш юзасидан топшириқлар берди.

– Туман салоҳияти юксак бўлишига қарамай, кўрсаткичлар паст. Бутун кучни бириктириб, ишни тизимли ташкил этиш керак. Мамлакатга истиқболли лойиҳалар ва янги ишлаб чиқариш қувватлари керак. Обикор майдонларни тўлиқ ўзлаштириш, сувни тежаш технологияларини жорий этиш йўналишини кучайтириш зарур. Туманга етарли даражада ёрдам кўрсатилмоқда. Ундан самарали фойдаланинг. Қишлоқ хўжалигини ранг-баранглаштиришга устувор аҳамият қаратиш даркор, – деди Дархан Сатибалди.

Туман ҳокими Серик Мамитовнинг таъкидлашича, қишлоқ хўжалиги, савдо, саноат ва қурилиш соҳаларига устувор аҳамият қаратилмоқда. Шу мақсадда сармоя жалб этиш, янги технологияларни жорий этиш, меҳнат унумдорлигини ошириш, ишсизлик даражасини пасайтириш борасидаги ишлар жонлантирилади.

Туманда жорий йилнинг 9 ойида ялпи минтақавий маҳсулот ҳажми 112,5 млрд. тенгени ташкил этди ва ўтган йилнинг шу даврига нисбатан 10,2 фоизга ўсди.

Ишлаб чиқилган тараққиёт дастурида барча кўрсаткичларни яхшилаш кўзда тутилган. 2030 йилга бориб минтақавий маҳсулотнинг умумий ҳажми 2,3 баравар ошиб, 387 млрд. тенгега етказилади. 

Саноат соҳасида 63,2 млрд тенгелик 20та лойиҳа амалга оширилади. Натижада, 2706 киши иш билан таъминланиб, бюджетга 1 млрд. 260 млн. тенге солиқ тушади. Туманда 50 гектар майдонда “Жетісай” индустриявий минтақасини очиш режаланган.

 Ҳозирги кунда туманда ноқонуний берилган ер участкаларини давлатга қайтариш тадбирлари давом этмоқда.