Унда сўзга чиққан Қозоғистон Президенти, биринчи навбатда, БМТнинг самарали фаолияти муҳимлигини таъкидлади.

– Қозоғистон ташқи сиёсатнинг устувор йўналиши сифатида белгиланган асосий халқаро ташкилот билан ҳамкорликка жиддий аҳамият қаратади. Давлатимиз БМТ Низоми, Инсон ҳуқуқлари умумжаҳон декларацияси ва бошқа асосий халқаро шартномалардаги мақсад, тамойилларга содиқ бўлиб, зиммасига олган мажбуриятни оғишмай бажариб келмоқда. Республикамиз БМТни замонавий талаблар асосида ислоҳ қилишга қаратилган саъй-ҳаракатни қўллаб-қувватлайди. БМТ инсоният учун муҳим  оммабоп ташкилот. Афсуски, айрим мамлакатлардаги бугунги вазият кўплаб давлатларни, жумладан, Қозоғистонни ҳам хавотирга солмоқда. Шу боис Бирлашган Миллатлар Ташкилотини ислоҳ қилиш керак. Биз йирик давлатлар ўртасида тинчлик ўрнатилиши шарт, деб ҳисоблаймиз. Улар ўртасидаги низо ва тўқнашувлар туфайли ташкилотнинг Хавфсизлик Кенгаши боши берк кўчага кириб қолди. Қозоғистон каби ўрта кучлар минтақавий даражада, шунингдек, дунёвий маконда тинчлик ва хавфсизликни мустаҳкамлашда жуда муҳим ўрин тутиши мумкин, – деди Қасим-Жўмарт Тўқаев.

Давлат раҳбари жаҳон савдосидаги зиддиятлар ҳақида ҳам фикр билдирди.

– ЖСТга аъзо давлат сифатида Қозоғистон ушбу муҳим савдо-иқтисодий ташкилотнинг барча меъёр ва қоидаларига қатъий риоя қилади. Лекин турли тўсиқларга дуч келмоқда. Қозоғистон ҳали бундай қийинчиликларга дуч келмаган. Чунки биз минтақадаги қўшниларимиз ва бошқа давлатлар билан амалий ва ўзаро манфаатли муносабатларни сақлаб келмоқдамиз. Шу боис бундан буён ҳам минтақамизда бу каби муаммолар юзага келмайди, деб ўйлайман. Айни пайтда биз барча йирик давлатларни бундай босим дастакларидан фойдаланмасликка чақирамиз, – деди Президент.

Қасим-Жўмарт Тўқаев Қозоғистон ташқи сиёсати, Украина ва Яқин Шарқдаги вазиятга оид саволларга жавоб берди. Шунингдек, ёшларнинг мамлакат тараққиётидаги ўрнига алоҳида тўхталди.