Шимкент шаҳридаги “Дўстлик уйи”да 8 март–Халқаро хотин-қизлар куни ҳамда Қозоғистон халқи Ассамблеясининг 30 йиллиги муносабати билан “Жамоат тотувлиги” муассасасининг ташаббуси билан шаҳар ўзбек этномаданият бирлашмаси “Сен барибир муқаддассан, муқаддас аёл!” мавзуидаги байрам тадбирини ўтказди.

Концертда аёл латофати, гўзаллиги, донолиги, ҳаётдаги ўрни тараннум этилди. Санъат юлдузларининг ёрқин чиқишлари, дилтортар наволар янгради, куй ва рақслар ижро этилди. Меҳмонлар томонидан табрик сўзлари айтилиб, оналарга эҳтиром кўрсатилди. Шу билан бирга, тадбир чоғида хотин-қизларнинг жамиятдаги ўрнини алоҳида таъкидлаш мақсадида тақдирлаш маросими уюштирилди.

Тадбирда халқ хўжалигининг турли соҳаларида муваффақиятларга эришган хотин-қизлар тақдирланиб, уларнинг меҳнатлари ҳамда соҳа тараққиётига қўшган ҳиссалари муносиб баҳоланди.

 “Хаси-фешн” хотин-қизлар миллий либосларининг намойиши уюштирилди. Шу билан бирга, Шимкент шаҳар ўзбек драма театрининг артистлари ижросидаги куй-қўшиқлар анжуманга алоҳида файз бағишлади.