Ҳукуматда Қозоғистон Республикаси Бош вазирининг ўринбосари Тамара Дуйсенова раислигида “Ишчи касблари йили” республика комиссиясининг биринчи йиғилиши ўтди. Тадбирда республика ва минтақавий миқёсдаги чора-тадбирлар режаси муҳокама қилинди.

Умумий режа 70 босқичдан иборат 7та асосий йўналишни ўз ичига олади. Минтақалар бўйича 20та ташаббус белгиланди. Мутасадди вазирлик ва бошқармаларга ишчилар тайёрлаш тизимини такомиллаштириш, мактаб ўқувчиларини касб-ҳунарга йўналтириш, иш берувчиларни ушбу тадбирларга жалб этиш каби вазифалар юкланди.

– Жорий йилда мамлакатимизда 12та йирик республика ва халқаро тадбирлар ташкил этилади. Улардан биринчиси февраль ойида пойтахтда ўтади. ЭКСПО кўргазмалар марказида “Ишчи касблари шаҳри” деб номланган фестиваль ташкил этиш режалаштирилган. 5 кун давом этадиган тадбир ишчи касблар салоҳиятини намойиш этиш, келажак касблари ва инновацион технологияларни намойиш этишдан иборат. Фестиваль доирасида иқтисодиётнинг амалий шўъбасидаги  оммабоп йўналишларга бағишланган павильонлар ташкил этилади. Унга барча минтақалардан йирик корхоналар ва саноат бирлашмалари жалб этилади, – деди Таълим вазири ўринбосари Едил Ўспан.

Йиғилишда “Самұрық-Қазына” ҲЖнинг “Ишчи касблари йили” доирасидаги чора-тадбирлари ва истиқболдаги режалари ҳам кўриб чиқилди. Унинг тасарруфидаги  компаниялар гуруҳида 255 мингдан ортиқ киши меҳнат қилади, улардан 190 мингга яқини ишчи касблар вакилларидир. Ҳозирги кунда ҳам бу ерда  5000 мутахассисга талаб мавжуд. Шу боис таълим муассасалари билан шартномалар тузиш, меҳнат ярмаркаларини ўтказиш, ёш кадрлар малакасини ошириш дастурларини ҳаётга татбиқ этиш кўзда тутилган.

“Самұрық-Қазына” ҲЖ 2032 йилгача 46та йирик сармоявий лойиҳаларни амалга оширишни режалаштирмоқда. Унинг доирасида жами 64 мингдан зиёд иш ўрни яратилади. ҲЖ ишчи мутахассисларни тайёрлашда иштирок этишдан манфаатдор.

Шунингдек, комиссияга “Ишчи касблар йили” доирасида йирик корхоналар томонидан режалаштирилган тадбирлар лойиҳаси тақдим этилди.